Американскиот претседател Барак Обама во четвртокот доцна навечер, во најопсежната доселеничка реформа наназад неколку децении, повика милиони доселеници коишто кои немаат лични документи да „излезат од сенката“, најавувајќи обемен план за привремена заштита од заканите со депортација за речиси пет милиони доселеници, малку помалку од вкупно 11,4 милиони лица без лични документи, колку што се проценува дека ги има во САД.

Американскиот претседател Барак Обама од Белата куќа порача дека ќе го употреби својот претседателски авторитет за да им овозможи на некои родители американски државјани или лица со постојан престој во САД, а кои немаат документи, како и на лицата кои во САД дошле како деца, легално да живеат и да работат во Соединетите држави.

„Доколку се во Америка подолго од пет години, доколку имате деца кои се американски државјани или имаат постојан престој и доколку се пријавите, успешно ја минете проверката за неказнување и сакате да го плаќате својот дел од данокот, ќе може да аплицирате за привремено останување во оваа земја, без страв од депортација“, порача Обама.

Големо мнозинство од оние коишто ќе имаат полза од овие мерки на американскиот претседател се околу 4 милиони родители „без хартија“ кои во САД живеат најмалку пет години и чиишто деца се американски државјани или имаат постојано живеалиште во САД. Тие во иднина законски ќе смеат да се пријават на конкурс за некое работно место и ќе се вклучат во американското општество, но нема да имаат право од на глас и нема да можат да добија здравствено осигурување.

САД се, инаку, една од ретките земји коишто го гарантираат статусот на државјанин на сите оние коишто ќе се родат на нивната територија.

Доколку родителите аплицираат за новата законска можност со којашто можат да побараат останување во САД по законски утврдените рокови, ќе им биде овозможено останување со децата, наместо досегашната практика поради којашто мораа да бидат депортирани, а нивните деца родени во Соединетите држави остануваа на грижа на роднини или пријатели. Мачните и болни присилни раздвојувања на семејствата веќе се со години наназад во фокусот на американската јавноста и медиумите.

Со самото ова, тие стануваат даночни обврзници во САД, што е адутот којшто Обама упорно го истакнува во исцрпувачката шестгодишна борба да ја истурка реформата на доселеничките политики низ Конгресот.

„Тоа не ви гарантира добивање државјанство, ниту право на трајно останување во САД, ниту ви ги нуди истите повластици коишто ги имаат американските државјани, бидејќи тоа може да ви го одобри единствено Конгресот. Велиме само дека нема да ве депортираме“, појасни американскиот претседател.

Новите мерки, меѓутоа, се однесуваат само на лица коишто во тој статус се наоѓале до објавата на Обама, а веќе оние двојки коишто добија дете и само минута по обраќањето до јавноста на американскиот претседател нема да ја имаат таа можност. Планот на Обама, исто така, предвидува и значително построги мерки за депортација отколку досега, што се однесува и на голем број деца коишто во текот на 2014 година надојдоа во САД од земјите од Централна Америка без никаква придружба. Тоа значи дека сите коишто во САД влегле илегално по 1-ви јануари 2014 година, вклучително и 68 илјади деца без придружба, ќе бидат на листата приоритетни лица за депортација./крај/мф/сн

Извор: Макфакс