Актуелниот американски претседател Барак Обама во говорот на Демократската национална конвенција ноќта кон четвртокот по средноевропско време во Филаделфија во целост ја поддржа поранешната прва дама и негова поранешна државна секретарка Хилари Клинтон во борбата против републиканскиот кандидат Доналд Трамп.

Обама ги повика демократите да ѝ овозможат на Клинтон да ја заврши работата којашто ја започнала пред осум години и истакна дека „Никогаш немало ниту маж, ниту жена, ниту јас, ниту Клинтон, кој е поквалификуван од Хилари Клинтон да ја извршува должноста претседател на САД“.

Обама на демократите и на американската јавноста особено им укажуваше на квалитетите коишто според него ги поседува Хилари Клинтон за претседателската должност истакнувајќи ја во прв ред нејзината способност да проценува, искуството и темпераментот, со кои може да се соочи со заканата од тероризам.

„Знам дека Хилари Клинтон нема да застане додека Исламската држава не биде уништена“, рече Обама додавајќи дека таа тоа нема да го стори прибегнувајќи на какви и да се мачења и забрана за влез на муслиманите во САД.

„Таа е подготвена да биде нов врховен командант. Вечерва ве повикувам да го сторите за Хилари Клинтон она што го сторивте за мене. Ве повикувам да ја поддржите на ист начин како што ме поддржавте мене“, истакна Обама.

Клинтон по завршувањето на обраќањето на Обама се појави на сцената по што двајцата насмеани и прегрнати им отпоздравуваа на делегатите.

Хилари Клинтон, сопругата на 42-от американски претседател Бил Клинтон, ќе ја прифати партиската претседателска номинација во говорот на крајот од конвенцијата во четвртокот навечер.

Обама и Клинтон беа ривали во предизборната кампања во 2008 година. По победата на изборите на коишто Обама стана првиот црнечки претседател, откако Клинтон се откажа во негова полза, ја именуваше за државана секретарка, должност од која таа се повлече по еден мандат, веќе навестувајќи дека може да се кандидира за претседателските избори на 8-ми ноември 2016 година.

Обраќајќи им се на делегатите Обама понуди алтернативна визија на САД којашто ја повторува републиканскиот кандидат Доналд Трамп, за кого Соединетите држави се под опсада од илегалните имигранти, криминалот и тероризмот и го губат влијанието во светот. Спротиставувајќи ѝ се на, како што ја оцени „длабоко песимистичка“ визија на Трамп, Обама рече „Америка којашто ја знам е исполнета со храброста и оптимизам… и чест и великодушност“. „Пооптимистичен сум во поглед на американската иднина од кога и да е претходно“, рече Обама во кошаркарската и хокеарски арена „Велс Фарго“.

Клинтон во вторникот постигна историски исчекор станувајќи првата жена којашто е номинирана од голема партија за претседателски кандидат.

Реплицирајќи на мотото на кампањата на Трамп – „Да ја направиме Америка повторно голема“ , Обама истакна „Америка е веќе голема. Америка е веќе силна. И во ветувам – нашата сила, нашата големина не зависат од Доналд Трамп“.

Обама потсети дека она што го смета за напредок во своите два мандата, се заздравувањето од економската рецесија, реформите на здравствениот систем и убиството на идеологот на Ал Каеда, Осама бин Ладен.

Обама изјави дека американските вредности — не раса, не религија или политичка определба – се она што ја прави Америка голема. „Тоа е причина поради која секој кој им се заканува на нашите вредности, без разлика дали е фашист, комунист, џихадист или домашен демагог, секогаш на крајот доживуваат неуспех“, рече Барак Обама./крај/мф/сн

Извор: Reuters