САД не се толку поделени како што некои тврдат, изјави во саботата американскиот претседател Барак Обама, по убиството на петте полицајци, како и на полициските убиства на двајца Афроамериканци во државите Минесота и Луизијана претходно оваа седмица.

„Колку и да е болна оваа седмица, јас цврсто верувам дека Америка не е толку поделена како што некои наведуваат“, изјави американскиот претседател Барак Обама на прес-конференцијата во полската престолнина Варшава каде што учествуваше на самитот на НАТО.

Резервистот во американската војска, 25-годишниот Афроамериканец Михај Ксавеир Џонсон, кој во неколку наврати бил ангажиран во Авганистан, предизвика хаос во Далас и ја шокираше американската нација убивајќи пет и ранувајќи уште седум полицајци на крајот од мирниот протест во четвртокот вечерта во Далас, против полициската бруталност кон припадниците на црното малцинство.

Уште поголема непријатност во американското општество предизвикаа зборовите на Џонсон кажани во преговорите со полицијата пред да биде убиен, дека има „желба да убива белци, особено полицајци“, што насочува на расно мотивирана одмазда за големиот број полициски убиства на Афроамериканцик.

Обама затоа изјави дека Џонсон „не ги претставува американските црнци,ниту духот во кој треба да одиме натаму“.

Убиецот од Далс, кој поседувал вистински арсенал, бил многу ефикасен во гаѓањето, во кои се ранети уште двајца цивили, пукал од неколку ката на една зграда, така што полицијата во прво време сметаше дека е нападната од неколку добро обучени снајперисти.

Властите го карактеризираа Џонсон како единствен напаѓач во Далас, кој го прифатил црнечкиот национализам, го искажал гневот поради полициското убиство на двајца црнци претходно седмицава во Луизијана и Минесота.

„Пореметен поединец кој ги изведе овие напади во Далас, тој не е повеќе претставник на американските црнци, туку исто колку што и напаѓачот во Чарлстон беше претставник на белите Американци или колку што напаѓачите во Орландо или Сан Бернандино беа претставници на американските муслимани“, изјави Обама говорејќи за неколкуте масовни убиство во изминатата година.

Повиците на борба против расните предрасуди и натаму доаѓаат од сите слоеви на американското општество, кое стравува дека ситуацијата би можела да скршне во нови насилства, особено по новото полициско убиство од саботата на вооружен Афроамериканец во Хјустон, кој бил застрелан откако не ја послушал наредбата на полицијата да го одложи оружјето.

„Кога сме во искушение, не смееме да бидеме скршени. Ние сме Америка, со врските кои нé поврзуваат. Ние сме истрајни, издржуваме, се креваме и сме солидарни. Кога куршумот на убиецот ја погаѓа полицијата во Далас, тој ја погаѓа нашата душа“, изјави во саботата американскиот потпретседател Џозеф Бајден.

Иако првично не беше планирано американскиот претседател поради инцидентот во Далас да ја скрати посетата на Европа, во саботата беше објавено дека тој ќе се врати на почетокот од седмицата во Далас.

Во саботата ширум САД продолжуваат да се одржуваат протесни собири под мотото „Животите на црнците се важни“, движење коешто предупредува на полициските бруталности кон црнците. Најновите поводи за овие протести се убиствата на невооружени црнци во Минесота и Лузијана./крај/мф/сн

Извор: Reuters