Американскиот претседател Барак Обама го објави, како што беше претходно најавено, во понеделникот вечерта својот план за чиста енергија, со итен повик за намалување на емисијата на гасовите коишто го предизвикуваат ефектот на стаклената градина.

„Ние сме првата генерација којашто го чувствува влијанието на климатските промени и последната којашто може нешто да преземе“, изјави американскиот претседател Барак Обама на собирот во Белата куќа на кој пред приврзаниците го изнесе својот амбициозен а според некои и контроверзен план за намалување на емисијата на ткн стакленички гасови од американските термоцентрали на јаглен.

„Имаме само еден дом. Имаме само една планета. План Б не постои. Доколку тоа не го сториме ние, никој нема… Кога светот е соочен со најголемите предизвици, Америка стои на чело на колоната. За тоа станува збор“, истакна Обама.

Оценувајќи ги климатските промени како најголема закана за човештвото, претседателот на САД изјави дека прописите, коишто од енергетскиот сектор бараат до 2030 година да ја намали емисијата на штетните гасови за 32 отсто во однос на нивото од 2005 година, ќе ја поевтината електричната енергија и ќе го подобрат здравјето на нацијата.

Планот со кој е предвидена замена на јагленот со обновливите извори на енергија, би требало на САД да им дадат појдовна точка за меѓународните разговори во Париз на самитот за климата кој ќе се одржи подоцна годинава за постигнување глобален договор за намалување на глобалното затоплување.

Обама има намера да го спроведе планот со помош на укази, заобиколувајќи го Конгресот кој одби да донесе некои закони за намалувањето на загадувањето на воздухот со јаглерод диоксид, гас кој научниците го сметаат за „виновен“ за затоплувањето на планетата. Указите би можеле да наидат на отпор и кај некои сојузни држава и големи компании, па нивниот долгорочен успех зависи и од тоа дали ќе успее да се спротистави на таквите и сличните пречки.

Планот на Обама за чиста енергија би требало да биде неговото главно наследство како претседател во борбата против климатските промени, едно од главните негови предизборни ветувања кога во 2008 година првпат стана челник на САД.

Објавувањето на планот веднаш предизвика осуди и критики од страна на републиканците. Челникот на мнозинството во Сенатот, Мич Мекконел, изјави дека новите прописи ќе ги изгаснат термоцентралите и ќе ја зголемат цената на електричната енергија. „Ќе сторам сé што можам да го спречам тоа“, порача Мекконел.

Претседателот на Претставничкиот дом од редовите на републиканците, Џон Бонер, го нарече планот „данок на енергијата“ кој администрацијата на Обама го воведува во периодот кога американската економија постепено заздравува од рецесијата. „Мислам дека планот е скап, безобѕирен напад врз Американците кои со тешки маки поврзуваат крај со крај“, истакна Бонер.

Претседателот Обама и претходно ги отфрлаше критиките дена неговиот план ќе предизвика раст на цените на енергијата, дополнително осиромашувајќи ги Американците и ќе згасне работни места. „Ова е исправна работа која мораме да ја сториме“, истакна./крај/мф/сн

Извор: Reuters/AFP