Два месеца откако на семејствата на грабнатите Американци им вети повеќе транспарентност и ефикасност, американскиот претседател Барак Обама во петокот го именуваше првиот „специјален претставник“ за заложници Џејмс О’брајан, а истовремено во Москва во рамките на засилените напори за наоѓање решение за Сирија отпатува Мајкл Рејтни.

Џејмс О’Брајан е поранешен дипломат, прекален во чувствителни меѓународни преговори, кој во 1990-те години беше советник на Медлин Олбрајт додека беше амбасадорка во ОН, а потоа и американска државна секретарка. Во тоа својство учествуваше и во изработката на Дејтонскиот мировен договор, со кој во 1995 година беше завршна војната во Босна и Херцеговина.

Позицијата претставник за заложници во Стејт департментот е воспоставена по шестмесечната ревизија на администрацијата на Обама на своите политики и дејствувања во заложничките кризи, поттикната од поплаките на семејствата дека нивните иницијативи да ги ослободат своите роднини кои се грабнати од терористи биле обесхрабрувани, а понекогаш и биле оневозможувани од владини функционери.

„Џим на својата нова позиција ќе има една од најважните цели – со дипломатија да овозможи сигурно враќање на Американците заточени во странски земји“, наведе во писмената изјава американскиот државен секретар Џон Кери.

Според него, искусниот дипломат ќе биде во „близок контакт“ со семејствата на грабнатите и со странските политички челници, ќе учествува во изработка на американската стратегија и ќе ги претставува САД во странство кој ќе се зборува за оваа чувствителна тема.

Според достапните податоци, од 11-ти септември 2011 година, досега се грабнати повеќе д 80 американски државјани, од кои 30-ина уште се во рацете на грабнувачите.

Истовремено руското министерство за надворешни работи во Москва во рамките на интензивните руски активност за барање политичко решение за сириската криза го прими новиот американски пратеник за Сирија, Мајкл Рејтни, кој разговараше со заменикот министер за надворешни работи, Михаил Богданов и со други дипломати. Двајцата не даваа изјави за медиумите по средбата.

Посетата на Рејтни на Русија е потврда на силниот ангажман на САД во содејствувањето со меѓународната заедница за да им се помогне на Сиријците во поставувањето на темелите за слободна и демократска иднина, изјави портпаролот на американската амбасада во Москва.

Последните денови зачестија дипломатските советувања во врска со барањето излез од конфликтот во Сирија, како што беше во текот на средбата кон средината на август во Доха меѓу шефовите на дипломатиите на САД, Русија и Саудиска Арабија.

Рускиот министер за надворешни работи Сергеј Лавров во понеделник во Москва треба да се сретне со претставниците на сириската опозиција којашто не дејствува воено, којашто ја прифаќа претседателот Башар ал-Асад.

Русија и Иран го поддржуваат алавитскиот (шиитски) претседател Башар ал-Асад, додека САД, ЕУ, сунитска Турција и сунитските арапски земји во регионот ја поддржуваат ткн „умерена“ сунитска сириска вооружена опозиција од којашто произлезе џихадистичката Исламска држава против којашто сега дејствува меѓународната коалиција.

Првпат во последните две години на 17-ти август 15-те земји членки на Советот за безбедност при Обединетите нации, меѓу кои и Русија и Кина, едногласно поддржаа иницијатива за поддршка на политичкото решение на сирискиот судир./крај/мф/сн

Извор: Reuters/AFP