Американскиот претседател Барак Обама во вторникот најави нови напади врз екстремистите во Сирија, откако претходната ноќ САД и неговите арапски сунитски сојузници во регионот ги нападнаа позициите на џихадистите од Исламската држава и уште една организација за кои Вашингтон смета дека планирале напади во Америка и Европа, а неговиот словенечки колега Борут Пахор изјави дека дури во саботата навечер дознал дека Словенија е ставена на листата од 50-ина американски сојузници за војната против IS, како и дека за учество во тие операции е потребен мандат од Советот за безбедност при Обединетите нации.

„Нема да ги толерираме бастионите на терористите кои му се закануваат на нашиот народ“, изјави американскиот претседател Барак Обама напуштајќи ја Белата куќа од каде отпатува во седиштето на Обединетите нации во Њујорк. Таму ќе се сретне со челниците на арапските земји кои се придружија на коалицијата што ја предводат САД против џихадистите од Исламската држава.Белата куќа објави дека покрај позициите на Исламската држава, ноќта кон вторникот на територијата на Сирија била нападната и групата Хорасан, блиска на глобалната терористичка мрежа Ал Каеда за да ги осуети нејзините планови за напади врз западни цели.„Веќе извесно време го следиме планирањето на нападите во САД или во Европа“, изјави заменикот советник на Обама за национална безбедност, Бен Родес, во разговор со новинарите кои патуваат заедно со американскиот претседател на Генералното собрание на ОН. „Веруваме дека планирале напади и надвор од Сирија“, додаде Родес.Обама претходно рече дека не е можно да се оцени колку операциите во Сирија и во Ирак под американско лидерство ќе траат. Во писмото до Конгресот на САД, Обама соопшти дека „Невозможно е да се знае траењето на тие операции. Ќе продолжам со дополните мерки неопходни за заштита и сигурност на американските државјани и нашите интереси од заканите на Исламската држава“, наведе американскиот претседател.Американските напади во Сирија беа помогнати со учество и на Саудиска Арабија, Обединетите Арапски Емирати, Јордан и Бахреин, додека само Франција веќе започна со напади врз позициите на џихадистите во Ирак, додека другите клучни американски сојузници, како Велика Британија, или сѐ уште се двоумат или најавија само поддршка на операциите без конкретно дејствување на нивните вооружени сили. Исто така, постои двоумење дали овие напади во трети земји можат да бидат преземани без одобрување на Обединетите нации, односно нивниот Совет за безбедност.Во тој контекст, словенечкиот претседател Борут Пахор во вторникот навечер призна дека дури во саботата дознал дека Словенија е на листата од педесетина држави кои ќе бидат сојузнички на САД во операциите против Исламската држава во Ирак и во Сирија.Пахор, меѓутоа, оцени дека за учество во тие акции против терористичката организација би бил неопходен мандат од Советот за безбедност при ОН. „Голем е ризикот доколку таквите акции се преземаат без потребниот мандат од Обединетите нации“, рече Пахор во изјавата за словенечките медиуми Њујорк каде учествува на заседанието на Генералното собрание на светската организација.Словенечкото министерство за надворешни работи кон крајот на минатата седмица, коментирајќи го појавувањето на Словенија на споменатата листа што ја објави Стејт департментот, наведе дека не е веројатно учеството на Словенија во оружени операции против Исламската држава, но дека земјата е подготвена да даде свој придонес во хуманитарните и другите операции во врска со борбата против исламските екстремисти./крај/мф/сн

Извор: AFP/STA