Расизмот кон афроамериканците е длабоко вкоренет во американското општество и во историјата, изјави американскиот претседател Барак Обама во интервју за телевизиската станица BET, кое ќе биде објавено во понеделник.
 

Расизмот кон афроамериканците е длабоко вкоренет во американското општество и во историјата, изјави американскиот претседател Барак Обама во интервју за телевизиската станица BET, кое ќе биде објавено во понеделник.

По неколкуте смртни случаи како последица на примена на прекумерна сила и огнено оружје од страна на бели полицајци против осомничени припадници на афроамериканската заедница, во прв план изби прашањето на расизмот во САД.

Деновиве беше реафирмирано истражувањето од летово на независната информативна непрофитна организација ProPublica кое докажува дека дури 21 пат е поголема веројатноста темнокожите млади Американци да станат жртви на тамошната полиција отколку нивните бели врсници. Соработниците на ProPublica истражувале 1.217 престрелки со полицијата со смртни последици во периодот од 2010 до 2012 година. Притоа, според резултатите од студијата, поголемиот дел од таквите инциденти се однесува на случаи во кои биле инволвирани афроамерикански тинејџери на возраст од 15 до 19 години, односно 31,17 на милион црнци биле убиени во вакви инциденти, наспроти 1,47 на милион белци на споменатата возраст.

Анализата на ProPublica покажува дека станува за многу остра разлика, којашто ја илустрира со тоа дека за да биде еднаков ризикот за двете споредувани групи тинејџери, би биле потребно три години во кои седмично би гинеле дури 185 бели млади луѓе.

Трите инцидента во последните четири месеци во кои бели полицајци предизвикаа смрт на црни тинејџери, и нивните правосудни исходи, односно одбивањата на големите пороти да покренат судски процеси против припадниците на полицијата, предизвикаа протести ширум САД. Тензиите особено се засилија откако беше објавена одлуката да не се покренува процес против полицаецот од гратчето Фергусон каде што 28-годишен бел полицаец застрела 18-годишен афроамериканец за кој се тврди дека бил невооружен.

Претседателот Барак Обама во исечокот од интервјуто емитуван во неделата зборува за своите разговори со групата млади активисти за граѓански права, вклучително и водачите на протестите во Фергусон, кои минатата седмица ги водел во Белата куќа.

Тој им порачал на активистите дека станува збор за нешто што е „длабоко вкоренето во нашето општество, длабоко вкоренето во нашата историја“. Америка направи некои чекори, вели Обама, што дава надеж дека дополнителниот напредок ќе биде постигнат.

„Иако тие инциденти се болни, не можеме да кажеме дека она што се случува денес е исто со она што се случуваше пред педесет години“, вели челникот на САД.

Општата неправда кон црниците предизвика во 1950-те појава на движењето за граѓански права во САД. „Доколку разговарате со своите родители, дедовци и баби, чичковци, ќе ви кажат дека денес е подобро, не добро туку подобро“, додава американскиот претседател.

Обама изминатата седмица, заедно со министерот за правосудство Ерик Холдер, кој исто така е црнец, презема одредени чекори во врска со расните проблеми меѓу полицијата и граѓаните од другите расни и етнички заедници ширум Соединетите држави./крај/мф/сн

Извор: Макфакс