Американскиот претседател Барак Обама на заедничката прес-конференција со германската канцеларка Ангела Меркел во Белата куќа изјави дека неговата администрација ги разгледува сите можности за решавање на кризата во Украина, истакнувајќи дека сé уште не донел одлука дали САД на Киев ќе му испорачаат смртоносно оружје како што изгласа во декември Конгресот, пренесуваат агенциите. 

Законот кој го донесе Конгресот на САД едногласно кон средината на декември одобрува нови санкции против Русија и испорака на смртоносно оружје за Украина. Испораката на такво оружје од САД во Украина беше можна веднаш, но е во надлежноста на американскиот претседател кој досега се противеше и одобри само помош во радари, возила, опрема за деминирање, ноќни визири, панцирни елеци и противминофрлачки радари. Последната седмица, по ескалацијата на судирите во источна Украина, админстрацијата на претседателот Барак Обама преку медиумите најави дека размислува за испраќање на оружје за украинската армија, што ја предизвика француско-германската иницијатива за постигнување мирно решение, стравувајќи дека американската одлука ќе придонесе за проширување на конфликтот.

Обама ја предупреди Русија дека „со сила не може да ја менува картата на Европа“, но нагласи дека САД „не сакаат да ја ослабат“ Русија во сегашната криза, којашто е најлошата меѓу двете супер сили од завршувањето на идеолошката блоковска Студена војна.

„Можноста за убиствено одбранбено оружје е едно од оние опции коишто се разгледуваат, но сé уште не сум донел одлука за тоа. Нашата цел не е да ја опремиме Украина за напаѓачки дејствија, туку само за да може да се одбрани“, истакна американскиот претседател.

„Меѓутоа, можеме ли да бидеме сигурни дека убиственото оружје коешто ќе и’ го испратиме на Украина ќе биде употребено на вистинскиот начин, дека нема да падне во погрешни раце, дека нема да предизвика преагресивни акции коишто Украинците не можат да ги поднесат? Какви реакции тоа ќе предизвика, не само меѓу сепаратистите, туку и кај Русите: Сето тоа се прашања коишто треба да се земат предвид“, предупреди и порача Обама.

Германската канцеларка Ангела Меркел изјави дека, и покрај тешкотиите во настојувањата да постигне дипломатско решение со Русија околу Украина, ќе ги продолжи тие напори, бидејќи Германија смета дека кризата не може да се реши на воен начин. Потсети дека веќе објави што мисли за испраќањето смртоносно оружје за Украина, но истакна и дека сојузот меѓу САД и Европа ќе остане цврст и тогаш која двете страни „нема да се согласат околу некои работи“.

„Како некој кој доаѓа од Европа, можам само да кажам дека доколку се откажеме од принципот на територијален интегритет, нема да можеме да го одржиме мирен поредокот во Европа. Доколку и во некој момент мора да се призне дека не можно да се оствари успех, дури и доколку е преземено сé, тогаш САД и Европа мора да седнат и заеднички да размислат за другите можности кои може да се преземат“, изјави Меркел.

Обама изјави дека „руската агресија само го зајакна единството на меѓународната заедница“, при што уште еднаш се заложи за дипломатско решение на украинската криза. Истовремено истакна дека, доколку во текот на претстојната седмица нема напредок во дипломатското решение на ситуацијата со Русија, САД и Европа ќе испратат силен заеднички одговор, независно од можните такктички разијдувања.

„И натаму настојуваме да постигнеме дипломатско решение, но јасно даваме до знаење дека ако Русија продолжи да се однесува како досега, што ја уништува нејзината економија и му штети на рускиот народ, а има ужасни последици по Украина, нејзината изолираност дополнително ќесе влоши, и политички и економски“, се закани американскиот претседател. Додаде дека САД ќе ги задржат на сила економските санкции против Русија и со меѓународните партнери ќе го јакнат дипломатскиот притисок врз Москва./крај/мф/сн

Извор: Макфакс