Американскиот претседател Барак Обама го истакнува „богатото искуство“ на неговата поранешна државна секретарка Хилари Родам Клинтон која учествува во трката за номинација на Демократската партија за негов наследник, една седмица пред почетокот на предизборите во сојузната држава Ајова, каде што битката во демократскиот табор може да биде особено жестока.

Во разговорот за весникот Politico, претседателот Барак Обама избегнува да се определи јасно за ниту еден од двајцата водечки кандидати за номинацијата на Демократската партија за претседателските избори во ноември годинава, Хилари Клинтон и Бени Сандерс, меѓутоа особен простор во разговорот ѝ отстапува на поранешната државна секретарка и прва дама на САД.

Сепак, тој истакнува дека за него во крајна сметка „приоритет број еден е да биде заменет од претседател демократ“.

„Нејзината сила, тоа што поседува богато искуство и многу добро ги познава сите прашања, може понекогаш да ѝ помогне да биде попретпазлива и да ѝ даде на нејзината кампања нота поблиска на прозата отколку на поезијата“, вели Обама.

На директното прашање „дали би бил многу задоволен, доколку како прв претседател афроамериканец биде заменет од првата жена претседател“, Обама одговара воопштено. „Воопшто сакам во нашата политика да има повеќе жени и за да моите ќерки чувствуваат дека за нив ништо не е невозможно“, вели челникот на САД.

Но говорејќи конкретно за Клинтон тој искажува големи комплименти. „…. Но тоа значи дека може да управува и да биде подготвена од првиот ден. Таа има повеќе искуство од кој и да е друг кој претендира на ова место…“, додава американскиот претседател.

Во некои од последните анкети Бени Сандерс е изедначен со Хилари Клинтон за демократските партиски предизбори кои на 1-ви февруари ќе се одржат во сојузната држава Ајова и кои се сметаат за многу значајни за натамошниот тек на кампањата. Подемот на сенаторот од Вермонт го изненади штабот на Клинтон по големата поддршка што таа ја уживаше во јавноста есенва и ја наруши размената на куртоазните реплики меѓу двата кандидата.

Одговарајќи на прашањето за споредбата, што американките медиуми редовно го истакнуваат, меѓу позицијата во која е Сандерс и онаа во која тој беше во 2008 година пред изборите во Ајова, Обама оценува дека таа е без основа. Имено Ајова има особено место во политичката кариера на Барак Обама. На демократските предизбори во 2008-ма, кога противкандидат му беше токму Хилари Клинтон, како тогашен сенатор од Илиноис Обама изненади со победата во Ајова, што го означи почетокот на патеката која го доведе до неговиот прв претседателски мандат.

„Мислам дека таа (споредбата) не е исправна“, одговара Обама, додавајќи дека иако реториката на двајцата кандидати „понекогаш се разликува“, заедничка им е подготвеноста за промени во врска со многу теми, од образованието преку даночниот систем до здравството.

„Мислам дека Хилари воедно имаше и повластица и товар од што ја сметаат за фаворит“, вели Обама, истакнувајќи дека во полза на Сандерс е тоа што е нов на домашната политичка сцена, иако долго е сенатор. „Луѓето секогаш се свртуваат кон она што е ново, и тоа е лошо за неа“, додаде фалејќи ја и „големата веродостојност“ на сенаторот од Вермонт.

Запрашан за коментар во врска со кампањата меѓу кандидатите на Републиканската партија, каде води ексцентричниот милијардер Доналд Трамп, Обама одговара дека според него „Трамп и до одреден степен (сенаторот Тед) Круз ги користат чувствата на гнев и разочарување“, коишто „реално постојат во Републиканската партија и републиканската (електорална) база“.

Меѓутоа, американскиот претседател изразува надеж дека непосредно пред изборите „републиканските гласачи ќе се успокојат и ќе запрашаат: Кого навистина сакаме да видиме во (претседателската) фотелја, кој носи одлуки важни за нашата иднина?“. Во принцип, вели Обама, тој верува дека победничката стратегија мора да се заснова на „оптимистички погледи“ за иднината на земјата, иако во раната фаза е полезна политичката исклучивост.

Одговарајќи негативно на прашањето дали ги следи републиканските телевизиски дебати, Обама сепак ги критикува како „шоу на кое не се дискутира за проблемите“, признавајќи дека и самиот бил критикуван за неуспехот пред народот да ги претстави своите идеи и уште еднаш искажувајќи жалење, како и во своето неодамнешно последно годишно обраќање до нацијата, што во своите мандати не успеал да ги сплоти САД и да се надминат идеолошките и политичките поделби./крај/мф/сн

Извор: Макфакс