Американскиот претседател Барак Обама повика на „итно и безусловно“ ослободување на израелскиот војник кого палестинското исламистичко движење Хамас го заробило во енклавата Појасот Газа на прес-конференција во петокот навечер, на која зборуваше и за јакнењето на американската економија, за односот на рускиот претседател Владимир Путин кон санкциите против неговата земја, како и за мачењата во САД по терористичките напади од 2001 година.

Новото примирје во Појасот Газа тешко ќе биде постигнато, доколку за него не се заложи и Хамас, оцени американскиот претседател Барак Обама и притоа побара поголема заштита за цивилите во палестинската енклава кои се практично заробени на тесна област со 1,8 милиони жители, поради жестоките судири меѓу израелската армија и Хамас.„Јасно ги осудивме Хамас и палестинските струи кои се одговорни за смртта на двајцата израелски војници и за грабнувањето на еден војник само неколку минути по објавувањето на (72-часовното) примирје. Мислам дека ќе биде многу тешко повторно да се воспостави примирје, доколку Израелците и меѓународната заедница не можат да бидат сигурни дека Хамас ќе ги исполни своите ветувања во врска со примирјето“, изјави Обама на прес-конференцијата.Обама, исто така, истакна и дека „јасно дадов до знаење дека недолжните цивили во Газа, блокирани поради судирите, мораат да делуваат на нашата совест и мораме да сториме повеќе за да ги заштитиме“.На американскиот државен секретар Џон Кери треба да му се даде целосна поддршка во неговите напори да договори прекин на огнот. Доколку Кери успее да издејствува „прекин на борбите“ во Газа, тоа решение би можело да спаси животи и да ја осигури безбедноста на Израел.Рускиот претседател Владимир Путин работи против интересите на својата земја занемарувајќи го ефектот на западните санкции врз руската економија, изјави на истата прес-конференција Обама. „Сторивме сѐ што можеме да ја поддржиме украинската влада и да ја одвратиме Русија од подлабоко задирање во Украина. Меѓутоа ограничувања постојат во она што САД можат да го сторат доколку (претседателот) Путин и Русија продолжат да ги занемаруваат своите долгорочни интереси“, рече Обама. „Објективно говорејќи, претседателот Путин би требало тоа да го реши дипломатски, да им се укинат санкциите и руската економија да се врати на растот. Но понекогаш луѓето не постапуваат рационално“, заклучи Обама.Обама зборуваше и за предлогот за нов закон за имиграцијата за кој жестоко се дебатира во Претставничкиот дом.„Републиканците се обидуваат да прифатат екстремна и неизводлива верзија на законот за кој веќе однапред знаат дека не води никаде“, изјави американскиот претседател и најави дека би можел да стави вето на тој закон и самиот да го реши овој проблем, со Конгресот или без него.Во изминатите девет месеци, до 30-ти јуни 2014 година, околу 57 илјади деца од Средна Америка се притворени на американско-мексиканската граница поради нејзино преминување без родители. Соочена со чувствителното прашање коешто предизвикува политички поделби, администрацијата на претседателот Обама има намера повеќето деца да ги врати дома, бидејќи тие не ги задоволуваат условите за барање азил, ниту статусот на бегалци.Обама на подолгата прес-конференција призна и дека САД згрешиле прибегнувајќи кон тортура за да извлечат информации од (осомничени) терористи по нападите од 11-ти септември 2001 година. „Мачевме некои луѓе. Сторивме некои работи спротивни на нашите вредност“, рече Обама. Според него, тоа се случувало во состојба на зголемен степен на безбедноста по нападот од 2001-та и „важно е за нас премногу поради тоа да не морализираме“, изјави американскиот претседател кој за мачењата говореше пред новинарите, бидејќи се очекува Сенатската комисија наскоро да го објави извештајот за техниките за испитување на наводните терористи. Обама донесе забрана за тие методи на испитување кога стапи на претседателската должност, меѓутоа Централната разузнавачка агенцијa (CIA) демантираше дека методите како што се симулирање на давење во вода и ускратување на правото на сон можат да се наречат тортура.Обама призна дека САД со тие техники „ја минале линијата“ и заклучи дека „тоа мора да се сфати и да се прифати“. „И како земја ја преземаме одговорноста во надеж дека тоа во иднина нема да се повтори“, додаде.Претседателот кажа и дека стои зад директорот на CIA, Џон Бренан, кој во четвртокот призна дека агенцијата ги пребарувала компјутерите во Сенатот со кои се користел персоналот задолжен да истражи какви техники CIA применувала испитувајќи ги осомничените терористи. Бренан, притоа, на сенаторите им се извини поради пребарувањето на компјутерските мрежи.Во март годинава претседателката на сенатската комисија задолжена за споменатата истрага, сенаторката Диана Фејнстејн, ја обвини CIA за илегално мешање во истрагата на Конгресот за методите на испитување коишто се применувале во периодот на администрацијата на претседателот Џорџ В. Буш.Обама на прес-конференцијата во Белата куќа оцени и дека американската економија сега е „посилна“, но дека уште многу работи треба да се направат „Добра вест е дека економијата е многу посилна. Работите одат на подобро. Но има низа мерки кои би можеме да ги донесеме за да го задржиме тој ритам, а може и да го забрзаме“, рече Обама. „Се заземав за разумни предлози, како што е обновувањето на нашата инфраструктура (…), поддршката за милиони важни занимања и помош за компаниите да бидат конкурентни. Предложив зголемување на минималната плата“, илустрираше Обама.„Републиканците во Конгресот сѐ досега ги спречуваа и занемаруваат тие мерки“, истакна Обама кој последните седмици сѐ погласно го критикува американскиот Конгрес./крај/мф/сн

Извор: Reuters