Во експлозијата која одекна на њујоршки Менхетен во саботата ноќта по локално време повредени се 29 луѓе, и нема жртви, соопштија во неделата властите кои велат дека уште не можат да кажат што е причината за детонацијата, а медиумите нагаѓаат дека можеби станува збор за импровизирана експлозивна направа каква што порано во саботата експлодираше во канта за отпадок пред почетокот на хуманитарна трка во соседната сојузна држава Њу Џерси. 

Сепак, властите сметаат дека станува збор за намерен криминален чин, но дека засега нема докази дека е поврзан со тероризам. Во самиот Њујорк, инаку, е зголемено ниво на безбедноста поради одржувањето на 71-та сесија Генералното собрание на ОН, на која се очекуваат да дојдат 135 светски челници и десетици шефови на дипломатии.

Експлозијата се случила околу 20,30 часот по локално време, односно во 2,30 часот во неделата по македонско време меѓу 23-та улица и 6-та авенија во самиот центар на Њујорк. Во квартот Челзи инаку се наоѓаат многу популарни ресторани, барови и продавници, па во саботата вечерта во близина на местото на инцидентот имало голем број жители и туристи.

Експлозијата, за којашто се наведува дека била „заглушувачка“, се случила пред зграда во која се наоѓа здружение на слепи лица, во која живеат вакви лица, минуваат низ обука и добиваат други потреби услуги.

Повредените главно настрадале од парчиња од скршено стакло, велат очевидци. По експлозијата местото било веднаш евакуирано од страна на полициските службеници, а евакуирани се исто така и соседните домови.

Началникот на њујоршката полиција, Џејмс О’Нил, на вонредната прес-конференција изјавил дека „во експлозијата настрадаа 29 луѓе, еден од нив се здобил со сериозни повреди“. Истакнал и дека „точната причина за експлозијата не е утврдена“.

Портпаролот на њујоршката противпожарна служба Даниел Нигро изјави дека се повредени 29 луѓе, од кои 24 се пренесени во болниците, а меѓу нив едно лице е потешко повредено. Другите претрпеле полесни повреди од стакло и метал, рече Нигро.

Њујоршкиот градоначалник Бил де Блазио и другите градски функционери изјавија дека истрагата го исклучила истекување на гас како причина за експлозијата, но одбиле да кажат што сметаат дека би можело да ја предизвика детонацијата.

„Нема докази во овој момент дека експлозијата е поврзана со тероризам. Во моментов нема посебна и уверлива Закана за Њујорк од која и да е терористичка организација“, изјави градоначалникот де Блазио на прес-конференција неколку часа по експлозијата., пренесува Reuters.

Од полицијата соопштија дека пребарувајќи го соседството по експлозијата пронајдена е можна „втора направа“ неколку блокови подалеку. Како што пренесува телевизијата CNN, повикувајќи се на полициски извор, таа се состоела од експрес лонец на кој се прицврстени жици поврзани со нешто што личело на мобилен телефона. Телевизијата, исто така, пренесува дека во близина на експлозијата е најдено парче хартија со белешка.

Експрес лонец е користен во експлозијата на Бостонскиот маратон од 15-ти април 2013 година, кога загинаа три а беа повредени повеќе од 200 луѓе. Еден од извршителите на тој напад, млади натурализирани американски државјани од чеченско потекло, Темерлан Царнаев беше убиен во пресметка со полицијата, а неговиот помлад брат Џохар за организирање и учество во терористички напад е осуден на смртна казна.

Импровизирана експлозивна направа експлодирала претходно во саботата во местото Сисајд Парк во американската сојузна држава Њу Џерси на патеката по којашто требаше да се одржи хуманитарна трка во поткрепа на маринците ветеррани. Според телевизиската мрежа NBC News, направата била направена од железни цевки, а експлодирала во канта за отпадоци, околу 9,30 часот по локално време, 15.30 по македонско. Во оваа експлозија беше причинета незначителна материјална штета. Но втора експлозивна направа е откриена во близина на местото на експлозијата, наведува Reuters, повикувајќи се на портпаролот на државното обвинителство. Засега не е познато дали оваа експлозивна направа е уништена во контролирана експлозија.

Последната експлозија се случи една седмица по 15-годишнината од терористичките напади од 11-ти септември 2001 година, во кои загинаа близу 3.000 Американци, поради што безбедносните служби го засилија степенот на приправност.

Според првите наоди во истрагата околу експлозијата во њујоршки Челзи, градоначалникот Бил де Блазио тврди дека станува збор за „намерен чин“. Додаде дека местото на експлозијата недалеку од Менхетен се третира како „место на злосторство“. Де Блазио, исто така, рече дека истрагата не верува дека експлозијата е поврзана со бомбата која претходно во саботата експлодираше во Њу Џерси.

Меѓутоа, американски функционери соопштија дека заедничките антитерористички сили, составени од сојузни, државни и локални функционери, повикаа на истрага на експлозијата во Челзи, сугерирајќи дека властите не ја исклучиле сосема можноста за поврзаност со тероризам. Заедничките антитерористички сили ја преземаа и истрагата во врска со инцидентот во Њу Џерси. Полициски извор за Reuters рекол дека прелиминарната истрага во Њујорк упатува на тоа дека експлозијата е предизвикана од импровизирана експлозивна направа.

Американскиот претседател Барак Обама, кој присуствуваше на конгресна вечера во Вашингтон, е „известен за експлозијата во Њујорк, чии примероци се истражуваат“, соопшти Белата куќа.

Експлозијата во Њујорк веднаш стана и тема во претседателската трка, имајќи предвид дека и двајцата најсериозни кандидати за Белата куќа доаѓаат од Њујорк.

Републиканскиот кандидат Доналд Трамп на собир во Колорадо рече „Малку пред мојот авион да слета, во Њујорк експлодираше бомба и никој точно не знае што се случува“, рече њујоршкиот бизнисмен неколку часа пред тамошната полиција да ја објави веста за експлозијата и истакна дека „сега треба да се покаже моќ“.

Демократската кандидатка Хилари Клинтон даде изјава во нејзиниот претседателски авион кој беше на земја во Њујорк, велејќи дека е известена за „експлозиите во Њујорк и во Њу Џерси“. Но додаде дека ќе причека повеќе информации пред да коментира./крај/мф/сн

Извор: Макфакс