Славниот холивудски режисер Оливер Стоун добитник на три Оскара, застана во одбрана на рускиот претседател Владимир Путин, кој според него со право „не го пуштил Крим“, во интервјуто објавено во вторникот во Росискаја газета.

„Многу Американци не разбираат дека Путин ги штити клучните геополитички интереси на Русија“, во кризата со Украина, вели американскиот режисер Оливер Стоун.

„НАТО и’ се додворуваше на Украина за Русија да остане без својата флота чие седиште е во Севастопол“, на Крим, црноморскиот полуостров со мнозинско руско население кое откако во февруари годинава прозападните сили по безредијата во Киев ја земаа власта, на референдум во март ја поврати автономијата укината во 1990-те кога Украина стана самостојна и се присоедини на Руската Федерација. Западот го смета тоа за руска анексија на украинска територија.

„Разбирам зошто Путин не можеше да го пушти Крим“, резимира режисерот кој честопати во своите филмови обработува политички теми како што е атентатот врз американскиот претседател Џон Ф. Кенеди или аферата Вотергејт која беше директна причина првпат во историјата на САД, шеф на државата – Ричард Никсон – да биде принуден да отстапи од должноста.

Според Стоун, кризата во Украина е стратегија на НАТО која настојува да се приближи на руските граници и покрај гаранците коишто Вашингтон му ги даде на поранешниот челник Михаил Горбачов непосредно пред распадот на Советскиот сојуз во 1991 година а потоа потврдени и со низа билатерални договори со руските раководства.

Кон почетокот на август славниот американски режисер, сценарист и продуцент напиша на својот профил на Facebook дека стремежот на САД да доминираат во светот може да се претвори во глобална катастрофа.

„Мразам да кревам паника во кој и да е облик, но сега сум преплашен. Не можам да молчам, гледајќи како слоумошнот на катастрофата го прекрива светот… ‘Бесниот пес’ Нетанјаху продолжува да го расипува угледот на САД во цивилизираниот свет со варварското крвопролевање во Газа. И покрај тоа, тоа не ги принуди САД да скршнат од фаталниот пат кој води во Источна Европа“, напиша режисерот.

Стоун потсетува дека американскиот претседател Барак Обама им порача на своите критичари дека „Очигледно, луѓето забораваат дека Америка како најмоќната нација на Земјата, сѐ уште нема целосна контрола над светот“.

„Тоа е многу смела изјава, доколку подразмислите. Од кога доминацијата во светот стана официјална политика на САД? Мислам, до 1991 година, до моментот на падот на комунизмот, но сега кога маските од нашите наместени насмевки паднаа, ние како граѓани на светот, а не само како Американци, треба нешто да направиме во оваа нова реалност: САД сакат да го контролираат светот и ние нема да се откажеме од обидите да го намалиме влијанието на Русија, Кина и Иран. И ќе прибегнеме кон постигнување на тоа со какви да се средства, вклучително и војна“, напиша во продолжение Оливер Стоун.

Малку претходно, славниот режисер повика да не се замаат со целосна верба информациите на американските медиуми кои ја обвинуваат Русија за вмешаност во уривањето на малезискиот патнички авион на 17-ти јули во источна Украина кога загинаа 298 луѓе.

Оливер Стоун, кој само што го сними документарниот серијал во десет епизоди под насловот „САД: Никогаш нераскажана приказна“, за најмрачните настани од американската историја, задно со украински продуценти е копродуцент на документарецот „Украина во пламен“ за кој би сакал да направи интервју со рускиот претседател Владимир Путин./крај/мф/сн

Извор: Макфакс