Генералниот секретар на Обединетите нации, Бан Ки-мун го осуди американскиот воздушен напад од саботата врз болницата во авганистанскиот град Кундуз во кој загинаа најмалку 19 и уште 37 луѓе беа ранети и побара независна и транспарентна истрага, додека американскиот претседател Барак Обама изјави дека станува збор за „трагичен случај“ и оти Пентагон ќе спроведе „целосна истрага“.

Во воздушниот удар за кој се обвинети американските воздушни сили во северниот дел на Авганистан беше нападната болница на меѓународната хуманитарна организација Лекари без граници (MSF), во која во моментот на нападот имало најмалку 105 пациенти и уште 80 вработени и персонал, Авганистанци и странски државјани. Според последните податоци, најмалку 12 вработени во MSF се меѓу жртвите, како и четири возрасни пациенти и три деца. Покрај 37-те ранети, уште многу луѓе се водат како исчезнати во остатоците од едно болничко крило кое целосно е уништен.

„Генералниот секретар силно ги осудува воздушните напади во Киндуз кои предизвикаа смрт и ранување на медицински персонал и пациенти в болницата на Лекари без граници на 3-ти октомври“, се наведува во писмената изјава од кабинетот на Бан Ки-мун во која се потсетува дека болниците и болничкиот персонал се строго заштитени со меѓународното хуманитарно право. Бан повикува на „темелна и независна истрага за да се обезбеди да има одговорност“ за слученото.

Американската војска призна дека изведувала воени операции „во близина“ на болницата, наводно гаѓајќи ги талибанските бунтовници кои пукале врз американски воен персонал и дека го истражува случајот. НАТО призна дека во еден американски воздушен напад „можеби е сторена колатерална штета врз блискиот медицински центар“

Првата бомба паднала во 2,10 часот во саботата утрото, на персоналот на MSF се јавил во штабот на НАТО во Кабул во 2,19 часот, а воените функционери во Вашингтон ги информирале неколку минути подоцна, но бомбардирањето продолжило до 3,13 часот, изјавил за Reuters неименуван функционер на Лекари без граници.

Американскиот претседател Барак Обама изрази сочувство поради настраданите здравствени работници и персоналот, нарекувајќи го тоа „трагичен случај“. Во соопштението на Белата куќа се наведува дека целосна истрага води Министерството за одбрана. „Ќе ги почекаме резултатите од истрагата, пред да донесеме конечен суд за околностите на оваа трагеди9ја“, се наведува во соопштението на Обама.

„Станува збор за голема трагедија, за којашто нема оправдување и, можно е да се претставува кривично дело“, изјави Високиот комесар на ОН за човекови права Зеид Раад ал-Хусеин. Барајќи темелна и транспарентна истрага тој додаде истакна дека „бомбардирањето на болницата може да биде воено злосторство доколку судот докаже дека бил планиран“.

Американскиот министер за одбрана Ештон Картер изјави во саботата ноќта дека се води „сеопфатна истрага“ за нападот, но не потврди дека го извеле американските сили. Според него, истрагата се води „в соработка со авганистанската влада“ и дека САД „ќе ја продолжат соработката со авганистанските партнери за да се направат обиди да се запрат судирите во Кундуз и во околината“.

Од MSF повторно истакнаа дека податоците за локацијата на болницата неколку им биле дадени на коалициските сили и на авганистанската страна во последните неколку месеци, а последен пат оваа седмица која .

Кундуз е голем и стратешки важен град во северен Авганистан, и изминатата седмица беше заземен од талибанските бунтовници. Авганистанското министерство за одбрана објави дека талибаните ја напаѓале болницата и ја користеле како „човечки штит“.

Снимките од местото на нападот покажуваат дека е урнат ден ѕид од болницата. „Три соби целосно се изгорени. Од некои се издигаше густ чад“, изјави Саад Муктар, директор за јавно здравство во Кундуз кој ја посетил болницата по нападот, додавајќи дека морал да ја напушти бидејќи сé уште се водат борби.

Од почетокот на борбите за Кундуз во понеделникот, болницата која располага со 150 кревети за пациенти, прифатиле вкупно 400 пациенти, кои биле сместувани во ординациите и административните простории на душеци на подовите./крај/мф/сн

Извор: Макфакс