Работната група за прекинот на огнот во Сирија, предводена од Русија и САД, го изнесе во саботата во Женева „позитивниот биланс“ од состојбата, објавија западни извори.

Првиот ден од прекинот на огнот во Сирија довел до намалување на насилствата во земјата, изјави за агенцијата РИА портпаролот на генералниот секретар на Обединетите нации, Стефан Дужарик.

„Ова е само првиот ден. Во моментов прекинот на судирите резултираше со намалување на насилствата“, изјавил Дужарик, коментирајќи го придржувањето до прекинот на огнот во Сирија, кој според американско-рускиот план стапи на сила на полноќ на 27-ми февруари по локално време.

„Механизмот е востановен од оние кои имаат влијание врз страните, за да се помогне во намалувањето на напнатоста и да се олесни почитувањето на прекинот на судирите“, додал портпаролот на челникот на светската организација во писмениот коментар.

„ОН, САД и Русија изнесоа позитивен биланс за првите часови од прекинот на непријателствата, на состанокот на работната група во Женева. Неколку инциденти се регистрирани, но ОН оцени дека се сузбиени“, изјавил за агенцијата AFP неименуван западен дипломат.

Меѓутоа, „треба да се почекаат неделата и понеделникот за да се види вистинскиот биланс“, имајќи предвид дека сабота во Сирија е неработен ден, додал изворот.

Претходно опозициска Сириска опсерваторија за човекови права (SOHR) објави дека руската авијација во саботата не извела ниеден удар. Имаше информации дека меѓународната коалиција предводена од САД извршила два воздушни удар врз позиции на Исламската држава во покраината Рака која е под контрола на џихадистите. Тие, пак, ја преземаа одговорноста за терористички чин во покраината Хама во кој во експлозија на автомобил бомба загинаа четири лица. На интернет Исламската држава објави дека нивен борец со автомобил полн со експлозив дошол меѓу сириските војници на влезот од градот Саламија во покраина Хама и убил 20 и ранувајќи 35 луѓе.

Командант на сириските бунтовници потврди дека владините сили го запреле гранатирањата и бомбардирањата во некои делови на Сирија, но оти во други било продолжено.

„Продолжувањето на кршењето на примирјето може да резултира со припаѓање на договорот. Во некои области режимските сили го запреа бомбардирањето, а во некои и натаму трае, како артилериските напади на Кафр Зеит во покраината Хама и Морек на северот од Хама“, изјавил за Reuters Фарес Бајеш, командант на бунтовничката група Фурсан ал-Хак која се бори како дел на Слободната сириска армија (FSA). Според него, бунтовниците го почитувале прекинот на огнот.

Истовремено сириската државна агенција SANA објави дека вооружените групации истрелале повеќе проектили врз станбени делови на главниот град Дамаск. Воен извор го повикал населението на предградието Источна Гута, во кое доминантни се сунитите и е едно до бунтовничките упоришта „да извршат притисок врз терористите за да не ги упропастат напорите за повторно воспоставување на стабилноста во тие области“.

Оваа работна група, во којашто учествува специјалниот пратеник на ОН за Сирија, Стефан де Мистура, веќе е состана во петокот во Женева неколку часа пред прекинот на огнот да стапи на сил, на што се согласија стотина групи на сириската вооружена опозиција и владата во Дамаск, а со него не се опфатени џихадистичките групи Исламска држава и Џебхат ан-Нусра, сириското крило на Ал Каеда.

Примирјето, според обемот, е најголемото од почетокот на војната во Сирија која се претвори во меѓуконфесионален судир од март 2011 година./крај/мф/сн

Извор: Макфакс