Иследниците на Обединетите нации објавија во понеделникот дека Израел и палестинските вооружени групи сториле груби прекршувања на меѓународното хуманитарно право и меѓународните прописи за човековите права во текот на судирот во палестинската енклава Појасот Газа во летото 2014 година, коишто би можеле да бидат карактеризирани како воени злосторства, чии заклучоци Израел ги оспори објавувајќи дека неговите сили дејствувале во „согласност со највисоките меѓународни стандарди“, додека палестински Хамас го поздрави извештајот и очекува судски постапки.

Истражната комисија на ОН не даде недвосмислени изјави за тоа дали воени злосторства се сторени, оставајќи ги таквите оцени за судовите или другите правни механизми. Во извештајот се наведува дека во 50-дневната војна во јули и август 2014-та во Појасот Газа се убиени 2.251 Палестинец, како и шест израелски цивили и 67 израелски војници.

„Комисијата успеа да собере податоци коишто укажуваат на тешки кршења на меѓународното хуманитарно право и законите за човековите права коишто ги извршиле Израел и палестинските вооружени групи. Во некои случаи, тие кршења би можеле да претставуваат воени злосторства“, се истакнува во извештајот.

Извештајот е претставен по едногодишна истрага и во него се повикува Израел да обезбеди поединости од своите „одлуки за гаѓањата“ за да овозможи независна процена на нападите во Појасот Газа, во коишто се убиени 1.462 палестински цивили од кои стотици деца, како што тврди палестинската страна, и уништени се илјадници домови.

Независните иследници, предводени од Американката Мери Мекгован Дејвис го осудија убивањето на наводните колаборационисти од страна на палестинските организации, оценувајќи дека можеби претставуваат воени злосторства. Членовите на комисијата, коишто ги именуваше Советот за човекови права на ОН, навестуваат во извештајот, исто така, дека највисокото ниво на израелскиот политички ешалон е одговорен за политиката којашто довела до она што може да претставува воено злосторство.

Во извештајот се осудуваат разорувањата и човечките патења без преседан. Комисијата за истрага на ланскиот судри, соопшти дека собирала суштински информации кои укажуваат дека можните воени злосторства ги сториле и двете страни.

„Димензиите на разорувањата и човечките патења се без преседан и ќе имаат последици врз генерациите кои доаѓаат“, изјави судијката Мекгован Дејвис на прес-конференцијата во Женева, истакнувајќи дека постои страв и во израелските градови на границата кон Појасот Газа од постојаните закани со ракетни напади, пренесуваат агенциите.

„Жално е што во извештајот не е препознаена длабоката разлика меѓу моралното однесување на Израел во текот на операцијата…., и на терористичките организации со коишто се судри. Бранејќи се од нападите, израелската војска дејствуваше во согласност со највисоките меѓународни стандарди“, објави израелското министерство за надворешни работи. Израелската дипломатија, исто така, истакнува дека овој извештај „го порачала ноторно пристрасна институција“, којашто е „опседната“ со Израел.

Исламистичкото палестинско движење Хамас кое владее во Појасот Газа, за кој во извештајот се наведува дека можеби понесува одговорност за воени злосторства кои вклучуваат и „неодредено“ истрелување ракети врз палестинските градови, соопшти дека ја поздравува осудата на дејствијата на Израел од страна на Советот за човекови права на ОН. Во соопштението се изразува и надеж дека резултатите од истрагата ќе придонесат за успешност на претстојната тужба пред Меѓународниот кривичен суд.

„Хамас ја поздравува одлуката на ОН да ги осуди израелските окупатори за воени злосторства за време на неодамнешната инвазија во Појасот Газа… Таквата јасна осуда на окупацијата треба да го следи повикувањето на (Израел – з.м.) пред Меѓународниот кривичен суд и сите други меѓународни судови“, се вели уште во соопштението.

Саеб Ерекат, член на извршниот комитет на ривалското палестинско движење Фатах – Палестинската ослободителна организација (PLO), изјави дека Палестина ќе ги разгледа заклучоците и препораките од извештајот на комисијата на ОН „со најголема внимателност. „… Ја повикуваме меѓународната заедница да се присети дека единствениот вистински пат кон мирот се состои во запирањето на израелската окупација која започна во 1967 година и во ставањето крај на неказнетоста на Израел за злосторствата сторени против нашиот народ“, изјави Ерекат./крај/мф/сн

Извор: Макфакс