Сиднејската полиција соопшти дека во напад на специјалците врз кафулето каде што беа држени заложници, сите се ослободени, а во локалот работат пиротехничари, објави весникот SMH на својот акаунт на Twitterе.

На социјалните мрежи се појави и информацијата дека грабнувачот е застрелан, меѓутоа полицијата не ја потврди таквата информација.

На својот акаунт на Twitter телевизијата CNN објави дека при земањето на заложниците загинале две лица, но ниту таа информација не е потврдена.

Истовремено се појавија спротиставени информации за бројот на ранетите. Според некои медиуми настрадале околу пет лица, од кои три се наоѓаат во критична состојба. Според локалните медиуми, меѓу жртвите е и еден полицаец.

Извршниот директор на компанијата „Lindt Australia“ изјави дека во локалот во времето на нападот работеле околу 10 лица од постојаниот персоналот на кафулето и најверојатно триесетина гости

Неколку десетици тешко вооружени полицајци го држea во опсада локалот на Мартин Плејс, во центарот на Сиднеј, каде што се наоѓа и седиштето на Австралиската централна банка, филијали на познати комерцијални банки, а во близина е и парламентот на сојузната држава Нов Јужен Велс.

Напаѓачот речиси 17 часа држеше заложници во кафуле во центарот на Сиднеј. Според телевизијата ABC News, откако полицијата го нападнала локалот, во кафулето влегле медицински лица со носилки. Според каналот Sky News, пак, најмалку четири лица настрадале во полициската акција. Засега нема официјални потврди на овие информации.

Вооружениот маж кој држeше во заложништво сé уште неутврден број заложници во кафуле во центарот на австралиски Сиднеј, е бегалец од Иран осуден за сексуално злосторство, а познато е дека испраќал писма на семејствата на австралиските војници загинати во борбени операции во странство, објави претходно австралиската полиција.

Ман Харон Монис, бегалец од мнозински шиитски Иран и самонаречен сунитски шеик, беше забарикадиран заедно со заложниците откако во 10 часот по локално време во понеделникот наутро упаднал во кафулето во центарот на Сиднеј. „Нема причини да не му го објавиме името“, изјавил за Reuters неименуван полициски функционер.

Во текот на денот официјално беше потврдено дека пет лица успеале да избегаат од кафулето, каде што вооружениот напаѓач ги држи во заложништво лицата чиј број се проценува над 30. Австралиските власти стравуваат дека инцидентот кој досега го водеа како вооружен напад, има поврзаност со организиран тероризам, бидејќи напаѓачот во излогот на кафулето го истакнал знамето на сунитската џихадистичка организација Исламска држава.

Во текот на заложничката криза којашто траеше 17 часови, две жени и двајца мажи во униформи на персоналот успеале да побегнат низ влезната врата, додека уште еден маж со престилка кој на полициските специјалци им довикувал да не пукаат, побегнал преку противпожарниот излез, јави австралиската телевизија ABC.

Грабнувачот во излогот на локалот го постави црното џихдистичко знаме на коешто наводно пишува „Нема друг Господ освен Алах, а Мухамед е негов пророк“. Телевизиските снимки прикажаа двајца заложници како во излогот на „Lindt Cafe“, на истоимениот швајцарски производител на чоколада и слатки, го држат црното знаме, а во јавувањата до медиумите заложниците ја пренесоа пораката на напаѓачот дека сака да разговара со премиерот Тони Абот. Грабнувачот, според заложниците, поставил четири бомби, две во кафулето и две на други места во градот, пренесува телевизијата Channel 10 TV.

Австралиската полиција засега се воздржува инцидентот да го квалификува како терористички акт, кусо соопштувајќи дека додека траат преговорите се разгледуваат сите опции. „Полициските преговарачи воспоставија контакт (со грабнувачот) и го одржуваат“, изјави заменичката началник на полицијата на австралиската сојузна држава Нов Јужен Веле, Катрин Барн.

Премиерот Абот дозволува можноста заложничката криза да има политичка мотивираност, но истовремено повикува на толеранција. „Австралија е мирно, отворено и великодушно општество и никогаш тоа не смееме да го промениме“, порача премиерот Абот.

Во Австралија има повеќе од 40 муслимански организации кои го осудија земањето заложници велејќи дека тоа е акт достоен за презир. „Го отфрламе секој обид да се одземат човечки животи на кое и да е човечко суштество, како и предизвикување страв и ужас во срцата“, се истакнува во заедничкото соопштение на муслиманските организации. „Тој чин достоен за презир им служи само на целите на оние коишто сакаат да ја уништат добрата волја на австралискиот народ и да му наштетат уште повеќе на исламот и на австралиските муслимани во земјата“, додаваат муслиманските организации изразувајќи надеж дека случајот ќе биде решен брзо и на мирен начин./крај/мф/сн

Извор: Макфакс