Осомничена за учество во терористичкиот напад од 17-ти август во тајландската престолнина Бангкок, се наоѓа во Турција и има намера наскоро да се врати на Тајланд за да даде изјава, пренесуваа локалните медиуми откако локалните власти објавија дека издале налог за нејзино апсење.

На листата на осомничените 26-годишната Ванна Суансан се најде бидејќи на нејзино име бил изнајмен стан во Бангкок во кој полицијата пронашла супстанции и материјали од кои се подготвуваат експлозивни направи.

„Јас не престојував во тој стан повеќе од година. Всушност јас го изнајмив, но таму живееја пријатели на мојот сопруг. Сепак, не знам колку луѓе живееле таму..“, ја цитира Сиансан The Bangkok Post. Според весникот, жената од јуни се наоѓа во Турција.

Според информациите со кои располага The Bangkok Post, двајца осомничени за експлозијата избегале од Тајланд и во моментов се наоѓаат во соседна Камбоџа.

Во рамките на истрагата за експлозијата во која загинаа 21 човек а 123 беа ранети, тајландската полиција во саботата уапси 29 луѓе, за кои се претпоставува дека се државјани на Турција. Истрагата смета дека тие најверојатно учествувале во процесот на испорака до местото на којашто била постаена експлозивната направа, но дека директно не се одговорни за нејзиното поставување. Налози за апсење се издадени за уште четири лица, покрај за Ванна Суансан, која инаку е државјанка на Тајланд.

Осомничен за вмешаност во експлозијата во тајландската престолнина, беше уапсен во саботата утрото во неговиот стан во северниот дел на Бангкок, Во текот на претресот полицијата пронашла во станот материјали кои може да се искористат за изработка на експлозивни направи. Меѓу предметите запленети во неговиот стан, била и кошула на која се откриен траги од ТНТ, експлозивот користен во нападот. Според локалните медиуми, во зградата во којашто живеел уапсениот во јуни биле изнајмени пет станови, в кои живеела група странци, се претпоставува дека се од Турција.

Подоцна во саботата попладнето тајландските власти соопштија дека уапсениот е турски државјанин, но без да го откриваат неговиот идентитет. Сепак, локалните медиуми објавија турска патна исправа која гласи на 28-годишниот Адем Карадаг од Истанбул, наводно најдена кај приведениот, како и уште неколку турски фалсификувани пасоши.

Како што пишуваше во неделата весникот The Bangkok Post, за време на истрагата полицијата открила таен магацин со експлозивни материјали во една повеќекатница во Бангкок. Во станот изнајмен на име на жител на Тајланд, биле пронајдени супстанции и предмети неопходни за подготовка на експлозивни направи. Тие се испратени на вештачење, а полицијата се обидува да открие стан или објект во кој се среќавале луѓето кои го планирале нападот.

Експлозијата се случи на 17-ти август вечерта во центарот на Бангкок, и во неа загинаа 21 човек, а 123 беа повредени, од кои неколку сé уште се во критична состојба. Импровизираната бомба на далечинско управување во чиешто подготвување бил користен тринитротолуол, била поставена на оградата на хиндуистичкото светилиште на божеството Ераван (триглав свет слон) во периодот кога храмот бил особено посетен, меѓу кои најбројно се туристи од Кина, кои се и најбројни меѓу жртвите, како и од Сингапур и Тајван.

Според една од верзиите за нападот, која почива на информациите за турското потекло на уапсениот, е дека станува збор за припадници на турската ултранационалистичка организација „Сиви волци“, смета британскиот аналитичар Ентони Дејвис, од специјализиран ресурс за воената сфера.

Според неговите информации, „Сивите волци“ стојат зад неодамнешниот напад врз конзулатот на Тајланд во Истанбул. Имено во јули годинава Тајланд по една година депортираше во Кина 97 припадници на муслиманската туркофона заедница Ујгури, кои го обвинуваат Пекинг за репресија, кој пак ги обвинува за серија крвави терористички напади, сепаратизам и поврзаност со екстремни исламистички организации. Еден месец претходно тајландските власти во Турција депортираа 173 Ујгури, кои биле турски државјани. Вендаш по ова следуваше нападот врз конзулатот во Истанбул.

Ујгурските активисти за човекови права ги обвинија тајландските власт за „насилно раздвојување на ујгурските семејства“, но премиерот Прајут Чан-Оча одговори сека депортациите биле „целосно легални“./крај/мф/сн

Извор: Макфакс