Муслиманските земји остро го осудија сaмоубиствениот бомбашки напад извршен во понеделникот ноќта во близина на второто најсвето место во исламот, Пророковата џамија во Медина, каде што е забрането секој вид насилство.

Нападот во Медина во кој се убиени четворица чувари, е еден од трите кои во понеделникот ја погодија Саудиска Арабија, вечер наспроти празникот Рамазан. Пред нападот во Медина, две експлозии го потресоа градот Катиф во источниот Дел од Саудиска Арабија, каде што е мнозинска шиитска заедница.

Претходно ноќта кон понеделникот одекна експлозија и во близина на американскиот конзулат во градот Џеда. Министерството за внатрешни работи на Саудиска Арабија соопшти дека извршител на овој напад е Пакистанец кој во градот живеел 12 години. Агенцијата Associated Press објави дека станува збор за 34-годишниот Абдула Калзар Кан, кој живеел во Џеда со сопругата и нејзините родители, и работел како возач, но властите на Пакистан не ја потврдија оваа информација.

Во експлозијата во близина на Џамијата на Пророкот во Медина, во западниот дел на Саудиска Арабија, покрај загинатите бомбашот самоубиец и четворицата припадници на обезбедувањето, повредени се уште пет полицајци.

Одговорноста за нападите сé уште никој не ја презема, но начините на кои се изведени потсетуваат на нападите на џихадистите од Исламската држава кои последната година извршија повеќе бомбашки самоубиствени напади во Саудиска Арабија, особено во светилиштата на шиитската заедница.

Особено нападот во Медина предизвика огорченост и кај сунитските и кај шиитските верски лидери, па дури и од власите на Иран, голем регионален ривал на Саудиска Арабија.

Најугледната институција на сунитските муслимани, универзитетот Ал Азхар во Каиро, остро го осуди варварскиот чин, потсетувајќи на „светоста на двете места, особено на Џамијата на Пророкот“.

Советот на саудиските имами, највисокото верско тело во монархијата, одговорните за нападите ги нарече „отпадници (оние) коишто осквернавија сé што е свет“. Претседателот на советодавниот совет Меџлис ал-Шура, Андалах ал-Шеик истакна дека „ова злосторство вредно за презир, не може да го изврши личност којашто во себе има и најмалку вера“.

Иранските власти остро го осудија „тероризмот во сите форми и насекаде во светот“ и повикаа на „меѓународно и регионално единство против овој феномен“, изјави портпаролот на иранското министерство за надворешни работи, Баграм Гасеми.

Шефот на иранската дипломатија Мохамед Џавад Зариф изјави дека „повеќе нема црвени линии за терористите“ и дека „ и шиитите и сунитите и натаму ќе бидат жртви доколку не се обединат“.

Односите на шиитски Иран и Саудиска Арабија со која владее сунитска династија која го практицира вехабитскиот ислам, се многу влошени, откако на почетокот од годинава во Ријад беше погубен влијателен шиитски клерик, а во Иран беа нападнати и запалени саудиските дипломатски претставништва. Претходно односите меѓу Ријад и Техеран беа влошени поради најголемата трагедија во историјата на хаџот во Мека и Медина кога загинаа илјадници аџии, претежно ирански. Иран ја обвини Саудиска Арабија дека не преземала доволно безбедносни мерки и оти ги крие вистинските бројки на жртвите.

Односите меѓу Техеран и Ријад се лоши и поради тоа што двете земји во регионалните кризи, како во Јемен и Сирија, поддржуваат различни страни во тамошните судири./крај/мф/сн

Извор: Макфакс