Осум лица се убиени во вторникот во напад на сомалиските исламистички милитанти од групацијата Ал- Шабаб врз министерството за образование во главниот град Могадишу кои активирале автомобил бомба во зградата по што следел напад на специјален вод. 

„Осум лица се убиени, главно цивили, но владините сили во целост ја преземаа контролата над министерството“, изјавил за AFP неименуван полициски службеник.

Ова е еден од ретките напади на Ал Шабаб во сомалиската престолнина откако пред две години беа потиснати од Могадишу од страна на силите на Африканската унија. Во вторникот тие го употребиле автомобилот бомба за да влезат во зграда на министерство за образование. Зградата на министерството се наоѓа инаку во округот К5, кој веќе бил цел на слични напади.

На 28-ми март, сомалиските владини сили ја преземаа контролата врз Мака ал-Муакрем, хотелот во Могадишу во кој отседнуваат владини службеници и странски дипломати, по неколкучасовна престрелка со милитантите на Ал Шабаб кои претходниот ден заземаа дел од хотелот. Тогаш загинаа 20 луѓе, меѓу кои и сомалискиот амбасадор во Швајцарија, Јусуф Мохамед Исмаил Барибари, а околу 30 луѓе беа ранети. Други 50 беа безбедно евакуирани а петте исламисти беа убиени. Ова беше четврти голем напад врз овој хотел.

Високиот полициски функционер, капетанот Мохамед Хусеин изјавил дека напаѓачите упаднале во комплексот на сомалиското Министерство за високо образование во вторникот, по што самоубиецот го активирал експлозивот во возилото на влезот на комплексот правејќи простор за влез на вооружените напаѓачи.

Портпаролот на исламските милитанти, Абдулазиз Абу Mусаб, во вторникот ја презема одговорноста за нападот и пред да биде завршен, и за AFP потврди дека вооружените активисти се во зградата на министерство за образование. Додал дека борците на групата влегле и во министерството за нафта во соседната зграда, што засега не е потврдено.

Исто така, не е познато дали владините сили ги убиел напаѓачите или дека тие успеале да побегнат.

Најсмртоносниот напад во последно време на исламистите од Ал Шабаб го изведоа на почетокот од април на универзитетот во Гариса во североисточна Кенија кога убиеја 148 лица, повеќето христијански студенти.

Премиерот Омар Абдирашид Али Шаркмарке се соочува со тешката битка со сузбување на корупцијата, со екстремистите од Ал Шабаб и со обновувањето на со војната опустошена Сомалија, којашто од 2006 година е сцена на смртоносните судири меѓу владините сили и Ал Шабаб, блиска на глобалната терористичка мрежа Ал Каеда.

Милитантите се истиснати надвор од главниот град Могадишу и во другите поголеми градови во земјата во операциите на владините сили и воената мисија на Африканската унија во Сомалија (AMISOM), која главно е составен од војници од Етиопија, Уганда, Бурунди, Џибути, Сиера Леоне и Кенија, а особено последната соседна земја поради тоа е цел на големи терористички напади на исламистите.

Радикалната исламистичка група Ал Шабаб (Движење на младите муџахедини) одржува тесни врски со глобалната терористичка мрежа Ал Каеда, поради што нејзините челници последните месеци беа цел на операции на американските командоси. Ал-Шабаб се смета за хетерогена организација којашто обединува голем број фракции, поделени по идеолошка и клановска основа. И покрај тоа, според експертите, таа останува силна групација и претставува сериозна безбедносна закана. Изминатите шест години Ал Шабаб се бори против централните сомалиски власти и ги попречува хуманитарните активности на ОН во земјата./крај/мф/сн

Извор: Макфакс