Сите граѓани, без разлика на која вероисповед и’ припаѓаат, траба да имаат исти права и должности, изјави челникот на Римокатоличката црква папата Франциск во петокот во Анкара на почетокот од неговата тридневна посета на Турција, и повика на укинување на сите форми на фундаментализам порачувајќи дека за запирање на радикалните исламисти во Сирија и во Ирак е поважна борбата против гладот и сиромаштијата отколку воената интервенција.
 

Сите граѓани, без разлика на која вероисповед и’ припаѓаат, траба да имаат исти права и должности, изјави челникот на Римокатоличката црква папата Франциск во петокот во Анкара на почетокот од неговата тридневна посета на Турција, и повика на укинување на сите форми на фундаментализам порачувајќи дека за запирање на радикалните исламисти во Сирија и во Ирак е поважна борбата против гладот и сиромаштијата отколку воената интервенција.

Папата Франциск во петокот попладнето ја започна својата тридневна посета на Турција, во текот на којашто ќе се обиде во сабота и недела во Истанбул да го поттикне процесот на помирување меѓу Римокатоличката и Православната црква, да го зајакне дијалогот со исламот и да го осуди прогонот на христијаните од Блискиот исток.

„Основно е муслиманите, евреите и христијаните (…) во законот и во спроведувањето да ги уживаат еднаквите права и да ги почитуваат истите должности“, изјави папата Франциск пред турскиот конзервативно исламски претседател Реџеп Тајип Ердоган на средбата во претседателската палата во престолнината Анкара, пренесуваат агенциите.

Папата рече и дека нема знаци за намалување на „терористичкото насилство“ во турското соседство каде што сунитските џихадистички екстремисти од терористичката организација Исламска држава на почетокот од јуни прогласија ткн исламски калифат на големите територии коишто ги контролираат во Сирија и во Ирак и ги прогонуваат шиитските муслимани, христијаните и другите коишто не го споделуваат нивното ултрарадикално сфаќање на сунитскиот ислам.

„Да се запре неправедниот агресор е легитимно, но секогаш со почитување на меѓународното право, а за тоа е потребен усогласен ангажман на сите, за ресурсите да се насочат, не на оружјето туку на другите благородни битки кои се вредни за човекот, а тоа се борбата против гладот и болестите“, истакна Папата.

Непосредно пред посетата на Турција, папата Франциск ги осуди нападите врз верските заедници во Ирак како „варварски, криминални и неописливи“и ги повика муслиманските челници појасно да се дистанцираат од таквите постапки.

Во Анкара Светиот отец повика на меѓуверски дијалог „за да се спречат сите форми на фундаментализам и тероризам кои тешко го понижуваат достоинството на секој маж и жена, а ја експлоатираат религијата“.

Посетата на папата Франциск на Турција е чувствителна мисија, бидејќи станува збор за секуларна држава во којашто последната повеќе од деценија е сé поприсутен конзервативниот ислам којшто го заговара владејачката Партија на правдата и развојот (АКР), и Анкара се двоуми да влезе во рамките на меѓународната коалиција предводена од САД против џихадистите од Исламската држава и одби да ја преземе водечката воена улога. Меѓутоа, ја поддржува сириската сунитска вооружена опозиција којашто од март 2011 година се бори да го собори од власт претседателот Башар ал-Асад, кој потекнува од алавитската (шиитска) заедница, а ја има поддршката и од умерените сунити, христијаните и друзите./крај/мф/сн

Извор: Reuters/AFP