Поглаварот на Римокатоличката црква папата Франциск во петокот ја започнува посетата на Турција каде што планира да ги продолжи своите поттикнувања за помирување со Православната црква, промовирање на дијалогот со исламот и да му се даде надеж на загрозеното христијанско малцинство на Блискиот исток.

Поради терористичките закани, папата Франциск во Турција ќе се превезува во блиндирано возило, иако од Ватикан тврдат дека причината за откажувањето од отворениот „папамобил“ не е од безбедносен карактер, туку дека во Турција не се очекува да се собираат луѓе коишто би стоеле крај патот да му посакаат добредојде.

По пристигнувањето на авионот на Папата рано попладнето на аеродромот во турската престолнина Анкара, по официјалниот свечен дочек на аеродромот, Франциск ќе го посети мавзолејот на основоположникот на современа Турција, Мустафа Кемал Ататурк. Папата Франциск потоа ќе се сретне со турскиот претседател Реџеп Тајип Ердоган во новата раскошна претседателска палата, чиешто градење чинеше 615 милиони американски долари и има илјада простории. Потоа Папата ќе ја посети Управата за религии – Дијанетот, каде што ќе се сретне со нејзиниот челник Мехмед Гормез.

Во сабота, на 29-ти ноември папата Франциск ќе го посети Истанбул, каде што ќе ја посети главната христијанска светија соборниот храм Света Софија (Црквата на светата Мудрост) своевремено најголемиот храм во христијанскиот свет којашто по османлиското освојување на Цариград во 1453 година е претворена во џамија па потоа во музеј во 1935 година, а пота и централна истанбулска џамија Султанахмет, на султанот Ахмед позната и како Сината џамија, католичката катедрала и грчката патријаршија во квартот Фенербахче. Исто така, Папата ќе се сретне и со поглаварот на Цариградската патријаршија Вартоломеј Први.

Во недела, духовниот водач на католиците ќе ја продолжи посетата на црквите во Истанбул. Тогаш се одбележува празникот на апостолот свет Андреј, кој е небескиот заштитник на Константинополската патријаршија. Во таа пригода во патријаршиската црква Свети Георги ќе биде богослужена Божествена литургија, а потоа папата Франциск и патријархот Вартоломеј Први ќе ја потпишат заедничка екуменска декларација.

„Се радувам на оваа средба и од неа многу очекувам. Голема е нејзината симболична вредност“, изјави Волфганг Тоенисен од Институтот за екуменизам во германски Падерборн.

Папата Франциск ќе биде четвртиот понтифик кој ја посетува Турција. Претходно тоа го сторија папата Павле Шести во 1967-та, во 1979 година Турција ја посети папата Јован Павле Втори а последен папа кој ја посети оваа земја беше Бенедикт Шеснаесетти во 2006 година.

Јакнењето на врските со Православната црква којашто се одвои од Рим со расколот во 1054 година ќе биде централната тема на посетата на Папата на Турција. „Ние не сме различни религии. Ние сме браќа кои израснаа раздвоени. Но и двајцата го следеле патот кој им го одредил Господ“, изјави цариградскиот екуменски патријарх Вартоломеј Први за италијанскиот католички неделник Famiglia Cristiana, во пресрет на посетата на Папата.

Папата е апсолутен поглавар на Католичката црква, но помирувањето го отежнува фактот што Вартоломеј Први всушност е само симболичен челник на православниот свет и не може да ја наметнува својата волја на поглаварите на десетиците автокефални православни цркви.

Напорите за помирување на двете цркви започнаа во 1964 година, кога папата Павле Шести се сретна со цариградскиот патријарх Атенагора во Ерусалим и тие двајца ги поништија меѓусебните екскомуницирања. Тоа беше првата средба на поглаварите на двете цркви по повеќе од половина милениум и почеток на долгоочекуваниот процес на помирување. Годинава, исто така во Ерусалим, Франциск и Вартоломеј Први ја одбележаа педесетгодишнината на оваа историска средба.

Цариградскиот патријарх во споменатото интервју вели дека за завршување на овој процес ќе биде потребно „труд, трпение, молитви, љубов од двете страни, почитување и духот на меѓусебно посакување добредојде“.

Пред посетата на Франциск на Турција, портпаролот на Ватикан, отец Фредерико Ломбарди, изјави дека Папата веројатно ќе се сретне и со претставниците на христијанските бегалци од Ирак и од Сирија, откако плановите да ги посети преку границата во курдските делови на Ирак пропаднаа од безбедносни причини.

Бројката на христијаните на Блискиот исток се намалува со децении, но во последно време дојде до масовен егзодус на христијаните особено од Ирак и од Сирија поради напредување на сунитските исламисти и особено на бруталните радикални групации како Фронтот ан-Нусра и особено џихадистичката Исламска држава. „Не можеме да го замислиме Блискиот исток без христијаните“, изјави во октомври папата Франциск.

Патријархот на Калдејската католичка црква во Ирак, Луи Рафаел Сако ги спореди нападите на Исламската држава врз христијаните и врз етничко религиската малцинска група со курдско потекло Јазиди во Ирак со нацистичкиот прогон на Евреите. „Тие варварски дела кои ќе останат дамка во човековата историја, ги поттикнуваат организации и идеологии слични на нацистичката и на другите тоталитарни политички филозофии“, истакна Сако.

Долгогодишниот американски известувач од Светата столица, Џон ален, смета дека загрозените блискоисточните христијани бараат зборови на охрабрување. „Клучно прашање пред тридневната посета на Папата е дали по неговото заминување христијаните ќе почувствуваат дека се во подобра позиција отколку што беа“, пишува Ален на порталот Crux Catholic.

Папата Франциск посетата на доминантно сунитската исламска Турција, исто така, ќе ја посвети и за натамошна промоција на дијалогот со исламот. /крај/мф/сн

Извор: Макфакс