Кина во петокот одговори на извештајот на американскиот Стејт департмент за состојбата со човековите права во светот во изминатата 2014 година, со свој „Извештај за човековите права во САД, 2014“, во кој се наведува дека во оваа земја е институционализирана расната дискриминација и загрозени се правата на жените и на децата.

Несомнен проблем на САД е раширеноста на оружјето и честите случаи на насилни злосторства, се наведува во кинескиот извештај кој од пред неколку години започна да го изготвува владата во Пекинг, како одговор на традиционалниот годишен извештај на Стејт департментот во кој Кина редовно се критикува за кршење на човековите права и слободи, впрочем и во последниот за 2014 година.

Во четвртокот Стејт департментот го објави својот годишен извештај за човековите права во светот, во кој се истакнува „систематското кршење на човековите права во Кина“, особено „репресијата против активисти, припадници на етнички малцинства, адвокати кои ги бранат човековите права, повредата на правата за слободно изразување, за движење, ограничување на слободата на медиумите, тортурите, жестоката контрола на интернетот, цензурата и другите облици на кршење на човековите права, што е секојдневна појава“.

Веднаш во петокот Кина во својот извештај ги обвини САД за „институционализирана расна дискриминација во силите за спроведување на редот и во правосудството“, а особено се наведуваат случаите на убиства извршени од страна на бели полицајци врз невооружени припадници на афроамериканската заедница., како што на пример инцидентот во Фергусот во летото 2014 година.

„Американскиот Стејт департмент на 25-ти јуни издаде нов извештај за човековите права во другите земји, притоа воопшто непокажувајќи ниту минимум жалење или желба да се подобри ужасната состојба со човековите права во сопствената земја“, се истакнува во предговорот на кинескиот извештај.

„Американските власти не успеаја да го стават под контрола растечкото насилство со огнено оружје и пресметките меѓу бандите кои достигнаа кулминација ширум земјата“, се наведува во кинескиот извештај за човекови права. Се истакнува дека станува збор за претерана употреба на сила од страна на полицијата, која довела до многу смртни случаи и предизвика незадоволство кај американската јавноста. Официјален Пекинг го потсетува Вашингтон во извештајот и на „бруталната тортура“ од страна на CIA.

Во него Пекинг ја критикува и „зачестеноста на семејното насилство врз жените и децата“ и се наведува дека жените во САД просечно се платени речиси 30 отсто помалку од мажите, односно на секој долар кој ќе го заработи маж, жената заработува 77 центи.

Извештајот насловен „Човековите права во САД, 2014“ го изготвил Државниот совет на Кина и го објавува во целост државната новинска агенција Синхуа.

Во извештајот се наведува дека „постојат доволно докази коишто укажуваат на тоа дека во 2014 година во САД, кои се самопрогласени бранители на човековите права, немало подобрување на постојните проблеми со човековите права, уште повеќе се јавуваат цела низа нови проблеми“, заклучуваат во Пекинг. Според кинеските власти, САД минатата година ги кршеле човековите права и во други земји на „поарогантен начин“, каде што им е покажан „црвен картон“ на „меѓународното поле на човековите права“.

Проблемот со човековите права е едно од најчувствителните прашања во односите меѓу САД и Кина. Вашингтон редовно ги обвинува кинеските власти за кршење на човековите права. Кинеското министерство за надворешни работи, како одговор, повеќепати ги повика американските власти за кршење на човековите права да се занимаваат во својата земја и да не се ставаат во улога на „меѓународен арбитер“, мешајќи се во внатрешните работи на други земји./крај/мф/сн

Извор: Макфакс