Американската команда за операциите на Блискиот исток ги отфрла претпоставките дека Турција соработува со терористичката организација Исламска држава (IS), вклучително и преку шверц на нафта во Сирија, како што презентираа неговите руски колеги претходно на прес-конференција во Москва, а портпаролот на Белата куќа на таквите руски обвинувања ги повтори американските поранешни обвинувања дека владата на сирискиот претседател Башар ал-Асад купува нафта од џихадистите кои ги заземаа нејзините нафтени наоѓалишта и рафинерии.

Воената команда на САД ги отфрла претпоставките за соработка на Турција и Исламската држава, вклучително и во нелегалната трговија со нафта, изјави портпаролот на американските единци во антитерористичките операции во Ирак и во САД, полковникот Стив Ворен кој преку телемост од Багдад во средата одржа брифинг со новинарите во Пентагон.

Коментирајќи ги на барање на новинарите обвинувањата и материјалите кои ги презентираше руското министерство за одбрана за улогата на Турција во купувањето и шверцот на сириска и ирачка нафта од Исламската држава со што таа ги финансира своите терористички активности, Ворен изјави дека „Ние решително ги отфрламе сите претпоставки дека Турција соработува со групата Исламска држава“.

„Тоа е едноставно смешно. Турција е во составот на антитерористичката коалиција и учествува во воздушните операции против Исламската држава“, рече американскиот портпарол, иако новинарите забележуваат дека таквите турски удари биле само неколку.

Ворен, исто така, истакна и дека „шверцот со нафта во регионот се одвива со децении“ и САД заедно со своите сојузници од коалицијата ќе продолжат да ги напаѓаат објектите на Исламската дражва кои се користат за да се добие профит од нелегалната продажба на сировини.

Портпаролот на Белта куќа, Џошуа Ернест, од друга страна, одби за новинарите да ги коментира наводите на Москва за тоа дека турскиот претседател Реџеп Тајип Ердоган и членови на неговото семејство се вклучени во нелегалната трговија со нафта и деривати што ја крадат џихадистите, Но истовремено рече дека „најголем потрошувач на нафта добиена од Исламската држава“ е владата на сирискиот претседател Башар ал-Асад.

„Траба да ѝ се обратите на руската влада за да ги потврди тие обвиненија“, рече Ернест за новинарите.

„Иронијата за Русите се состои во тоа што главен потрошувач на нелегалната нафта од Исламската држава е Асад и неговиот режим“, додаде Ернест, советувајќи ја Русија „да го постави тоа прашање“ на сириските власт.

САД во минатото повеќепати ја обвинија актуелната влада во Дамаск, чие заминување заедно со Турција го бараат, дека купува нафта од терористичките групи, кои всушност ги окупира сириските и ирачки ресурси.

Експертите на ОН пред една година оценија дека Исламската држава од продажбата на нафтата заработува меѓу 850.000 и 1,65 милиони долари на ден. Меѓутоа, според заменикот министер за одбрана на Русија, Анатолиј Антонов, претходно добивките на Исламската држава од нафтата изнесувале 3 милиони долари дневно, а приходот од илегалната продажба на нафта годишно изнесува најмалку 2 милијарди долари./крај/мф/сн

Извор: РИА Новости/TAСС