Најмалку пет цивили се убиени а седум се ранети во израелскиот воздушен напад изведен ноќта кон петокот врз стратешката југоисточна покраина Кунеитра на сирискиот дел од Голанската висорамнина, чиј западен дел го има окупирано Израел во 1967 година, соопштија во петокот воени извори во сириската престолнина Дамаск.

Сириската државна телевизија јави дека нападот бил извршен врз „цивилно возило“, кај местото Ком, 60 километри јужно од главниот грд Дамаск, малку пред полноќ во четвртокот, и во близина на многу посетуван покриен пазар.

Гувернерот на покраината Кунеитреа, Ахмад Шеик Андул-Кадер за сириската државна агенција SANA изјавил дека воздушниот напад бил извршен на патот кој води кон селото Кан Арнабех, кое се наоѓа во близина на Ком.

Израел во четвртокот навечер гаѓал 14 позиции на сириската армија во правец на Куниетра на сириската страна од Голанската висорамнина како одмазда за ракетниот оган за кој се обвинуваат палестинската организација Исламски џихад и Иран, соопшти израелската армија. Израелските сили тие позиции ги гаѓале со артилерија и воздушни средства, рекле за Reuters израелски воени извори.

Ескалацијата на израелско-сириската граница дојде откако ден претходно израелските борбени авиони бомбардираа област во сириска Кунеитра, откако Тел Авив тврдеше за ракетен напад изведен од сириска територија. Во првиот налет на израелските авиони било убиено едно лице а седум биле ранети, според сириската државна телевизија.

Израелската армија претходно во четвртокот соопшти дека „четири ракети истрелани од Голанската висорамнина паднале во Горна Галилеја“, планинска област на границата со Либан и делот од Голанската висорамнина која е под контрола на Израел. Притоа, во соопштението се истакнува дека немало настрадани.

Израелската армија, исто така, порача дека „тоа е дело на (палестинскиот) Исламски џихад … и сметаме оти владата на Сирија е одговорна за ракетирањето и ќе ги понесе последиците“.

Израелските медиуми наведуваат дека станува збор за првото официјално признавање дека е гранатирана територија на Сирија од војната во 1973 година, како и дека ова биле најжестоките израелски напади врз Сирија од тогаш.

Израелските напади во изминатите години откако во март 2011 година започна граѓанската војна во Сирија никогаш не беа официјално признаени. Но сириски воени извори тврдеа дека се биле гаѓани складишта и конвои со муниција за либанското шиитско движење Хезболах, кое е сојузник на алавитскиот претседател Башар ал-Асад и се борат против сирсиката вооружена опозиција и против сунитските џихдистички групи како Исламсакта држава и Џебхат ан-Нусра, која е сириско крило на Ал Каеда.

Израелскиот министер за одбрана Моше Јалон наводните напади од Сирија ги поврза со „агресивната иранска политика“ по постигнувањето на нуклеарниот договор со шесте светски сили на што Израел се противи и преку своите лоби групи во САД се обидува да го урне во американскиот Конгрес. Јалон порача дека „ова е само најава за она што допрва ќе следува, бидејќи по укинувањето на санкциите Иран ќе може да насочи повеќе средства во финансирањето на терористичките организации кои делуваат против Израел“./крај/мф/сн

Извор: Макфакс