Северна Кореја во саботата во замена за запирање на изведувањето на своите нуклеарни проби, побара склучување на мировен договор со САД и запирање на вообичаените воени вежби на САД и Јужна Кореја.

Меѓутоа, заменикот државен секретар Ентони Блинкен одговори дека Пјонгјан прво мора со своите дела да покаже дека е сериозен по прашањето на денуклеаризација на Корејскиот полуостров, за да може да започне какво и да е дијалог.

„Многу е тешко нивните најави да се сфатат сериозно, особено по нивното четврто нуклеарно тестирање“, изјави Блинкен по средбата со колегите од Јапонија и Јужна Кореја во Токио.

Северна Кореја на 6-ти јануари објави дека тестирала хидрогенска бомба и предизвика остри реакции од соседните земји и од САД. Оваа изолирана комунистичка земја со години повикува на мировен договор со САД и запирање на постојаните заеднички воени вежби со Јужна Кореја, каде што се стационирани 28.000 американски војници.

„Сé уште важат сите предлози за зачувување на мирот и стабилноста на полуостровот и во североисточна Азија, вклучително и предлозите коишто се однесуваат на запирањето на нашите нуклеарни тестирања и склучувањето на мировниот пакт, како и запирање на заедничките американско-јужнокорејски воени маневри“, пренесе во саботата севрнокорејската новинска агенција KCNA, цитирајќи го портпаролот на министерството за надворешни работи.

САД во Јужна Кореја имаат стационирано 28.500 војници, како поддршка на нејзината армија која брои 670 илјади. Северна Кореја, пак, има во нејзините вооружени сили 1,2 милион војници, но аналитичарите сметаат дека се вооружени со застарено оружје.Двете Кореи, практично сé уште се во војна, откако нивниот оружен конфликт од 1950 до 1953 година заврши со потпишување прекин на огнот, а не со мировен договор.

Во март 2013 година Северна Кореја објави дека еднострано се откажува од сите договори за ненапаѓање, кои се важечки во моментов меѓу Пјонгјанг и Сеул, како и за прекинување на директната телефонска комуникација меѓу двете земји, според соодветното соопштение на Комитетот за мирно обединување на татковината. Комитетот за мирно обединување на татковината, инаку, ја има улога на државен орган на Северна Кореја за односи со Јужна Кореја.

Северна Кореја, исто така, ја смета за „одамна невалидна” заедничката декларација со Сеул за денуклеаризацијата на Корејскиот полуостров. Покрај тоа, Северна Кореја тогаш ја прекина валидноста на Договорот за примирје, кој беше потпишан кон крајот на Корејската војна со САД, кои тогаш учествуваа во конфликтот под знамето на Обединетите нации.

На прашањето дали САД би го разгледале запирањето на заедничките воени вежби, портпаролот на Стејт департментот, Џон Кирби, изјави дека Вашингтон има сојузнички обврски кон Јужна Кореја.

Замениците министри за надворешни работи на САД, Јапонија и Јужна Кореја се согласија во саботата дека САД ќе воведат построги санкции против Северна Кореја, а Кина, единствениот сојузник на Пјонгјанг, ја повикаа повеќе да се вклучи во ова прашање. Пјонгјанг е и под санкции на Обединетите нации поради неговите ракетни и нуклеарни тестирања.

Американскиот дипломат Блинкен ја искористи можноста да ѝ порача на Северна Кореја да се угледа на Иран, бидејќи во саботата се очекува да бидат скинати санкциите за оваа земја поради нејзината нуклеарна програма, откако во Виена ќе биде соопштен извештајот за спроведувањето на договорот што Техеран минатото лето го склучи со шесте светски сили./крај/мф/сн

Извор: Reuters