Аргентинскиот државен обвинител Алберто Нисман кој беше пронајден мртов минатиот месец според досегашните сознанија откако се самоубил со пиштол во својот стан во главниот град Буенос Аирес неколку часа пред сенатската комисија да го изложи предметот во кој се товари претседателката Кристина Фернандез де Киршнер поради забошотување на истрагата против ирански функционери за терористички чин за нападот од 1994 година врз Еврејското здружение AMIA во кој загинаа 85 луѓе, имал подготвен налог за апсење на претседателката, објави истражителката задолжена за овој случај.

Хартиите биле пронајдени во отпадот во станот на обвинителот Алберто Нисман, а неговите сопствености и имоти и натаму се истражуваат за да се пронајдат траги коишто ќе овозможат да се утврди дали овој татко на две деца извршил самоубиство или бил убиен.

На 20-ти јануари истратата соопшти дека не се пронајдени траги од насилна смрт на телото на обвинителот Алберто Нисман којбеше пронајден мртов во својот стан во елитната четврт на аргентинската престолнина Буенос Аирес неколку часа пред да го образложи пред пратениците во Конгресот барањето за покренување истрага против претседателката Кристина Киршнер за попречување на истрагата за терористичкиот напад. Истрагата, сепак, сé уште не извлекува заклучоци, очекувајќи ги резултатите од експертизата, меѓу другото и за присуство на барутни честички на рацете на обвинителот Алберто Нисман. Тој беше пронајден со прострелна рана во главата во бањата во неговиот апартман во елитната населба Пуерто Мадера во Буенос Аирес. Покрај неговото тело во бањата којашто била заклучена од внатрешната страна беше пронајден пиштол со калибар 22 мм и чаура. Како што подоцна беше објавено, оружјето по негово барање му било дадено од негов колега поради самоодбрана. Неодамна, во последното интервју, Нисман изјави дека работејќи на споменатиот случај во прашање е доведен неговиот живот.

Претходно беше објавено дека архивите на аргентинските безбедносни служби по смртта на обвинителот ќе бидат отворени. Одлуката е донесена по наредба на претседателската Кристина Фернандез де Киршнер.

Со оглед на сериозноста на обвинувањата, обвинителот Нисман требаше во понеделникот претпладне да се сретне со група пратеници а подоцна во текот на денот пред Конгресот да ги презентира доказите што ги собрал. Неговите сомневања се засновале на снимки од телефонски разговори, од коишто наводно произлегува дека владата преку официјални канали водело преговори за поволности за Аргентина при постигнување на ткн договор за „жито во замена за нафта“.

Обвинителот тврдеше дека еден од условите од овој договор било прекинување на истрагата за евентуална одговорност на петмина Иранци барани во Аргентина во врска со терористичкиот напад од 1994 година. За докажување на своите тврдења, Нисман планираше пред суд за сведочење да ги повика и претседателката Киршнер и министерот за надворешни работи Ектор Тимерман.

„Налогот (за апсење) е пронајден меѓу документите“, изјави за локалната радио станица Вивиена Феин, главната истражителка во случајот на смртта на обвинителот Нисман.

Налогот за апсењето на претседателката Киршнер, за кој влијателниот опозициски дневен весник „Clarin“ тврди дека Нисман го составил уште во јуни 2014 година, не бил вклучен во неговиот извештај од 350 страници до правосудните тела кој бил доставен пред неговата смрт. Наместо тоа, Нисман ја повикал Киршнер по тоа прашање да се соочат на суд.

Во понеделникот, канцеларијата на истражителката Феин негираше дека постојат документи кои содржат налог за апсење, а аргентинската влада пишувањето на локалните медиуми го опиша како валкано.

Шефот на кабинетот на министерот Хорхе Капитанич драматично ја искинал копијата од документот во текот на неговиот брифинг со новинарите. Меѓутоа, во вторникот навечер Геин изјави дека дошло до забуна меѓу неа и нејзината канцеларија и дека документот навистина постои. „Прописно се ставени во актите за случајот, ништо не недостига“, изјав Феин во врска со налогот за апсење.

Нисман ги обвини Кишнер и Тимерман за заговор за „обезбедување неказнивост“ за Иранците, кои Аргентина ги обвинува за учество во експлозијата. Покрај тоа, Нисман се обрати до судот со барање за испрашување на претседателката и шефот на дипломатијата, како и замрзнување на нивниот имот од околу 23 милиони американски долари.

Покрај тоа, обвинителот обвини уште неколку аргентински политичари блиски до актуелната влада. Според него, тие биле посредници во преговорите со Иран, во кои Аргентина на Техеран му предлагала жито во замена на испорака на нафта, којашто е нужно неопходна за разнишаната аргентинска економија.

Владата преку министерот за надворешни работи Ектор Тимерман категорички ги отфрли обвинувањата на Нисман и тврди дека целта на неговата акција е да се дестабилизира владата девет месеци пред одржувањето на првиот круг од претседателските избор. Исто така, и Техеран повеќепати ги отфрлаше таквите обвинувања.

Нисман една седмица пред да биде најден мртов побара отворање истрага против Киршнер поради попречување на работата на правосудните тела. Ја осомничи претседателката дека ја кочела истрагата во полза на Иран, чии високи функционери ги гони аргентинското правосудство.

Во 1994 година, две години по нападот врз израелската амбасадата во Буенос Аирес, во подметната експлозија во зградата на еврејската организација здружение AMIA (Argentine Israelite Mutual Association) во центарот на аргентинската престолнина загинаа 85 луѓе а 300 беа ранети./крај/мф/сн

Извор: Reuters