Јужнокорејската влада во покраината Кенгидо затвори во градот Пјенгтаек 40 детски градинки и училишта поради спречување на ширењето на коронавирусот на блискоисточниот респираторен синдром (MERS), објави во вторникот покраинската управа за образование.

„Во период од една седмица запрена е работата на 18 детски градинки и 22 основни училишта во областа во којашто се наоѓа болницата во којашто се сместени заболените од MERS“, се вели во соопштението на покраинското министерство за образование. Според нив, постои можност вирусот да се прошири и на овие училишта.

Бројот на заразените од смртоносниот коронавирус во Јужна Кореја во изминатите 24 часа се зголемил за седум луѓе и достигна до 25 заболени. Покрај тоа, регистрирани се и првите жртви на ова заболување. Од компликации предизвикани од заболувањето починале 58-годишна жена и 71-годишен маж, објави корејското министерство за здравство и социјална заштита.

Поради тоа во главниот град Сеул се одржа итна седница на владата кои ги разгледуваа мерките за спречување на ширењето на вирусот. „Владата се мобилизира со сите расположливи ресурси и што е можно поскоро да се надмине овој проблем кој предизвикува голема загриженост кај населението“, изјави вицепремиерот Чои Јунг-хван

Јужнокорејските власти се изложени на остри критики за нерешителноста и непрофесионализам, благодарејќи на што заразата продолжи неконтролирано да се шири. Дури под силниот притисок на јавноста во понеделникот владата презема поактивни чекори, ограничувајќи го движењето на заразените и ставајќи во карантин 682 лица кои биле во контакт со заболените.

Првите случаи на инфекција со новиот вирус MERS-CoV беа регистрирани во септември 2012 година. Геномот на новиот вирус истата година првпат беше дешифриран во Холандија во Медицинскиот центар Еразмус, каде што на вирусот му е доделен кодот hCoV-ЕМС (human Corona Virus-Erasmus Medical Centre). Вирусите коишто припаѓаат на семејството коранавируси (коишто го добија овој назив поради многуте израстоци на површината со што потсетуваат на сончевата круна), предизвикуваат различни болести од настинка до атипична пневмонија SARS.

Првите тогашни анализи што ги направија британските стручњаци говореа дека најверојатно најблискиот роднина на вирусот nCoV е вирусот пронајден кај лилјак. Дополнителните анализи на германските научници упатуваа дека коронаворусот се раширил преку посредници, можно е и преку кози.

Новиот коронавирус или nCoV е од фамилијата вируси од којашто потекна и SARS-от (Severe Acute Respiratory Syndrome – SARS – Тежок акутен респираторен синдром познат и како „атипична пневмонија“), заразна болест која првпат беше откриена во ноември 2002 година во јужниот дел на Кина од кој починаа повеќе од 800 луѓе, а се прошири во 29 држави. И покрај тоа што имаше релативно мал број случаи регистрирани во светот, опасноста од инфекции и ширење на епидемијата е реална бидејќи широката светска популација нема стекнато имунитет. Како и SARS-от, и коронаворусот nCoV и другите слично вируси, може да предизвикаат кашлање, температура и воспаление на белите дробови.

Научниците будно следат за да воочат знаци на мутација на вирусот nCoV со која тој полесно би се пренесувал на повеќе приматели како што се случи со SARS-от кој предизвика пандемија.

Експертите на Светската здравствена организација (СЗО – WHO) коишто летото 2013 година престојуваа во Саудиска Арабија оценија дека е можно вирусот да се пренесува од човек на човек, меѓутоа само доколку двете лица се изложени на долготраен контакт. Смртноста од ова заболување достигнува 40 отсто./крај/мф/сн

Извор: Макфакс