Поранешниот израелски премиер Ехуд Олмерт ќе престојува во затвори уште еден дополнителен месец, покрај 18-те кои му беа пресудени во декември, одлучи во средата судот во Ерусалим.

Покрај декемвриската пресуда за земање мито, 70-годишниот Ехуд Олмерт потпишал спогодба со којашто признаа две теочки од обвинението за попречување на правосудството. Според одредбите од спогодбата, тој прифатил да отслужи дополнителни шест месеци затворска казна и да плати глоба во износ од 50.000 шекели (12.900 американски долари), но побарал новата шестмесечна казна да ја одлежи само симболично, односно таа да му биде обединета со постојната 18-месечна затворска казна.

Судот минатата седмица ја прифати спогодбата и ја донесе договорената пресуда, но во средата објави дека на Олмерт ќе му дозволи паралелно да одлежи само пет месеци, додека шестиот месец од казната ќе го отслужи по истекот на 18-те месеци од првата пресуда.

Ехуд Олмерт отслужувањето на затворските казни ќе го започне во понеделник, на 15-ти февруари, и така ќе стане првиот израелски премиер во историјата кој по извршувањето на должноста завршил во затвори.

Поранешниот израелски премиер Ехуд Олмерт кој беше премиер на Израел во периодот од 2006 година до 2009 година ланскиот мај беше осуден на затвор, но неговите адвокати веднаш најавија дека ќе вложат жалба, што го одложи извршувањето на казната, а потоа следеше спогодбата.

Инаку Олмерт беше прогласен за виновен на 30-ти март 2015 година, бидејќи примал и криел коверти со десетици илјади американски долари од американскиот бизнисмен Морис Талански. Според обвинувањето, Олмерт злоупотребил најмалку 150.000 од 600.000 долари колку што му исплатил Талански.

На поранешниот израелски премиер веќе му се заканува шестгодишна затворска казна во рамките на друга афера за корупција којашто во моментов е на разгледување во Врховниот суд.

Ехуд Олмерт кон половината на мај 2014 година беше осуден на шест години затвор поради корупција во големата афера „Холиленд” со недвижнини во периодот додека беше градоначалник на Ерусалим, од 1993 до 2003 година. Освен што е осуден на шестгодишна затворска казна, треба да плати парична глоба од милион израелски шекели, или 210.000 евра.

Со тоа Олмерт стана првиот политичар во израелската историја кој е осуден на реална затворска казна, и доколку не мине жалбата пред Врховниот суд, ќе биде највисокиот функционер затворени во земјата.

Центристот Олмерт, кој како израелски премиер се стекна со меѓународно реноме поради неговите напори за постигнување мир со Палестинците, ја отфрли целата вина во аферата „Холиленд”, инаку комплекс станови. Во пресудата за случајот „Холиленд“ на 50 страници, судијата истакна дека Олмерт, и покрај неговите заслуги за државата, извесно време учествувал во криминални врски и ја искористил службената положба за здобивање со големи парични износи. Казната беше изречена месец ипол откако судот докажа дека Олмерт добил најмалку 560.000 шекели, околу 100.000 евра за помош при реализацијата на проектот за изградбата. Инаку, беше обвинет за примање 759 милиони шекели, или 156.000 евра. Поранешниот градоначалник на Ерусалим не ја признава вината, а неговите адвокати бараа затворска казна од година пол.

Поранешен адвокат, голем љубител на елегантни костуми, скапи цигари, фудбал, добра храна и патувања во странство, Олмерт честопати беше цел на истраги на израелските правосудни органи, но секогаш досега се извлекуваше.

Политичкиот пад на Олмерт започна во септември 2008 година кога ослабен поради обвинувањата за корупција но функцијата ја извршуваше до крајот март 2009 година, одби да се кандидира на внатрепартиските избори на својата партија Кадима, од десниот центар, со што всушност отстапи од премиерската функција и беше заменет од актуелниот премиер Бенјамин Нетанјаху.

Олмерт кариерата ја започна како националист во партијата Ликуд за со времето да еволуира кон умерената струја. Така, во почетокот го поддржуваше големиот Израел и екстремните доселеници на палестинските територии на Западниот брег (на реката Јордан) и во појасот Газа, се спротиставуваше на договорите од Кемп Дејвид со Египет од 1978 година, како и на договорот од Осло со Палестинците од 1993 година, за конечно да се согласи со замислата за основање палестинска држава.

„Најубавиот ден во мојот живот беше денот која открив дека бројките се посилни од историјата и географијата на Израел. Открив дека ако тврдоглаво истрајуваме на тоа да задржиме сé, во 2020 година ќе има 60 отсто Арапи и 40 отсто Евреи на територијата на Палестина”, призна Омерт пред неколку години.

Во своите мемоари објавени во 2013 година, поранешната американска државна секретарка Кондолиза Рајс призна дека се изненадила кога Олмерт во мај 2008 година тајно ѝ предложил на Палестинците да им се вратат 94 отсто од територијата на Западниот брег и да се подели Ерусалим за да стане престолнина на двете држави, еврејската и палестинската.

Олмерт ја водеше изралеската влада од 2006 година, откако неговиот претходник и партиски колега Ариел Шарон доживеа мозочен удар и падна во долгогодишна кома. Тригодишното премиерствување на Олмерт кој подоцна се декларираше и како политичар од левиот центар, беше карактеризирано со заживувањето на изралеско-палестинските мировни преговори, како и со Сирија, со Втората либанска војна којашто повеќето Израелци ја сметаат за пораз, и големите операции во палестинската енклава појасот Газа, кога загинаа повеќе од илјада Палестинци./крај/мф/сн

Извор: Макфакс