Украинскиот претседател Петро Порошенко во четвртокот од американскиот Конгрес побара воена, политичка и економска помош од Вашингтон поради „подмолноста“ на Русија „којашто ѝ се заканува на светската безбедност“, а претходно Белата куќа, пред средбата на Порошенко со американскиот претседател Барак Обама, објави дека деблокирала 46 милиони долари за опремување и обука на украинските сили.

Украинскиот претседател Петро Порошенко кој престојува во Вашингтон одржа 45-минутен говор пред американските пратеници кои го поздравија со бурен аплауз.Тој на почетокот побара од Американците специјален статус за Украина како нечленка на НАТО. „Потребни сте ни, како и помошта од Америка. Апелирам до САД да ѝ дадат на Украина специјален статус и одбранбен статус кој ќе биде одраз на интеракцијата (со Западот) на највисоко ниво“, изјави Порошенко алудирајќи на кризата со Русија, откако со февруарските безредија во Киев беше соборен неговиот претходни Виктор Јанукович, на што руското мнозинство на црноморскиот полуостров Крим се реши преку референдум да ја врати својата укината автономија и да се присоедини на Руската Федерација, што Западот го смета за руска анексија на украинската територија, а од април започна и вооружениот конфликт во источните рускојазични региони кои не го признаваат легитимитетот на прозападните власти.Порошено побара во Вашингтон и „поголема политичка поддршка од светот“ за Киев како „повеќе борбена и неборбена воена опрема“ за украинската армија која нема успеси во судирите со проруските бунтовници и тврди дека Москва им дава помош во луѓе и воена опрема што руската страна одлучно го демантира.На економски план Порошенко се зазема за „вложување на американските компании во Украина поради давање поддршка за нашата економија и нашиот правосуден систем“, ветувајќи дека „помошта на Западот ќе се искористи за некорумпираните институции“.Порошенко, кого го нарекуваат „кралот на чоколадата“ поради неговата голема кондиторска компанија „Рошен“ преку која оствари статус на доларски милијардер, се заложи во Вашингтон земја да добие специјален статус. Меѓутоа, Вашингтон смета дека тој статус не ѝ носи ништо ново на Украина.Администрацијата на Обама, којашто соопшти дека ќе деблокира 7 милиони долари за хуманитарна помош, го исклучива испраќањето оружје на Киев, како што бараа и некои членови на американскиот Конгрес.„Не постои едноставно воено решение кое би овозможило промена на рамнотежата на силите. Целта е подобрување на капацитетите на Украина да се одбрани од упади на своја територија и долгорочно за обука и прилагодување на нејзините безбедносни сили“, изјави за Reuters неименуван американски функционер.Порошенко во американскиот Конгрес изрази и „загриженост за мирот во Европа“, оценувајќи дека „агресијата врз Украина е закана за светската безбедност“. „Доколку сега не ги сопреме (Русите) ќе ја минат границата на Европа, што е сигурна закана за светот“, предупреди украинскиот претседател повикувајќи ги САД и Европа „да не ја остават Украина сама“ во судирот со Русија.Во текот на говорот на Порошенко и пред средбата со американскиот челник Обама, Белата куќа најави дека ќе издвои 46 милиони долари за набавка на воена опрема и обука на украинските вооружени сили. Со тоа американската помош на Украина за нејзината армија достигна вкупно 116 милиони долари. Целта на оваа помош е надзор и осигурување на украинските граници и вооружување на војската за што поефикасно да дејствува во воената операција во источните региони. Наводно, оваа помош исклучува испораки на оружје, и ја сочинуваат телекомуникациска опрема, радари, панцирни елеци, шлемови и униформи./крај/мф/сн

Извор: AFP/Reuters