Првиот официјален состанок на претставниците на различните сириски опозициски групи и претставниците на Обединетите нации, кои настојуваат да покренат директни мировни преговори за Сирија, започна во понеделникот вечерта во Палата на нациите во швајцарскиот град Женева, јавува AFP.

Делегацијата на сириската сунитска опозиција бара хуманитарни мерки пред да ги започне преговорите со владата на претседателот алавит (шиит) Башар ал-Асад, чиишто претставници веќе во петокот се сретнаа со специјалниот пратеник на Обединетите нации за Сирија, Стефан де Мистура.

Откако долго се двоумеше да им се придружи на мировните преговори под покровителство на ОН, Високиот комитет за преговори (HCN), коалицијата на ткн политичка опозиција и претставниците на вооружените групации меѓу кои има и исламистички, на крајот се согласи во понеделникот попладнето да дојде во седиштето на светската организација во Женева.

Со Мистура се сретнаа уште во неделата, но неформално во еден хотел, повторувајќи го притоа своето барање да се преземат конкретни хуманитарни мерки во однос на бунтовниците и цивилите кои се наоѓаат во опкружување на силите на владата во Дамаск, пред да започнат преговорите.

Еден од тие барања, според дипломатски извори е „најлесно остварлив“, а се однесува на ослободување на илјадници луѓе од затворите. Имајќи предвид дека и последните неколку години претседателот Асад прогласуваше амнестија за затворениците и за бунтовниците кои ќе го положат оружјето.

Главниот преговарач на HCN, Мохамед Алуш, член на политичкиот совет на вооружената група Џаиш ал-Исламиа (Војската на исламот), која е подржувана од Саудиска Арабија, а којашто Дамаск ја смета за екстремна исламистичка терористичка организација.

Стефан де Мистура сака да воспостави директен дијалог меѓу конфронтираните стани, што е отежнато во прв ред поради расцепканоста на сириската опозиција, со претставници кои би ги пренесувале пораките. Тој процес би можел да трае шест месеци, колку што ОН одредија за постигнување договор за преодна влада којашто би ги организирала општите избори до летото 2017 година.

Сирискиот демократски конгрес (CDS), сојуз на курдската и арапската коалиција, одлучи да не учествува на преговорите во Женева, бидејќи ОН не ги повикале неговите шест курдски делагати.

„Во неделата навечер одлучивме да го суспендираме нашето учество во преговорите, бидејќи пет курдски делегати и еден Туркмен не добија покана од ОН“, изјави Хајтам Мана, копретседател на CDS.

Според него, опозициската делегација поинаква од онаа на HCN, којашто ги обединува најважните сириски опозициски групи требаше да учествува на преговорите во Женева и понудило листа со 35 имиња, од кои дваесетина припаѓале на CDS.

„Од тие 20 луѓе, шестмина добиле информација дека за нивното учество ќе се одлучува подоцна. Во неделата ноќта во Женева одлучивме со нашите курдски пријaтели, меѓу кои и беше и Салем Муслим, водач на главната партија на сириските Курди Партијата на демократскиот сојуз (PYD), дека нема да учествуваме“, појасни Мана.

Курдските делегати ја напуштија во саботата Женева, но се вратија во неделата за да присуствуваат на таа средба.

Учеството на Курдите, кои во сирискиот конфликт се држат резервирано и настојуваат да го зацврстат своето влијание во северните делови кон границата со Турција во кои живеат сириските Курди, предизвика контроверзии.

Русија, која е сојузник на претседателот Асад, смета дека преговорите без нив се невозможни, бидејќи тие се покажаа како најдобрите борци против џихадистите од Исламската држава и Џебхат ан-Нусра, како и поради тоа што претставуваат најмалку 10 отсто од населението и се хомогени на одредени области.

Меѓутоа, на тоа се противи Турција којашто го смета за сојузник на Работничката партија на Курдистан (PKK), која Анкара и Вашингтон ја сметаат за терористичка организација, а од минатото лето турската армија води жестока офанзива против неа../крај/мф/сн

Извор: Макфакс