САД и Русија по петнаесет часови го усогласија во саботата рано утрото во Женева планот со кој повторно треба да биде заживеан мировниот процес во Сирија, а тој вклучува примирје на територијата на целата земја кој треба да стапи на сили во понеделник на 12-ти септември, првиот ден ид муслиманскиот празник Курбан бајрам. 

Планот за мир во Сирија, исто така, вклучува подобрено и олеснување на доставувањето на хуманитарната помош и заеднички напади врз илсамистичките групации како што се Џебхат ан-Нусра и Исламската држава.

„Сергеј Лавров и јас во името на своите земји ги повикуваме сите заинтересирани страни во Сирија да го поддржат планот кој го договорија САД и Русија за низ политички процес што поскоро да се стави крај на овој катастрофален конфликт“, изјави американскиот државен секретар Џон Кери.

Рускиот министер за надворешни работи Сергеј Лавров изјави дека и покрај недовербата, Русија и САД изработиле пет документи коишто ќе овозможат координирање во борбата против тероризмот и повторно заживување на примирјето во Сирија. „Со тоа создаваме услови за продолжување на политичкиот процес кој долго беше закочен“, рече Лавров.

Средбата на шефовите на дипломатиите на двете земји агенциите го оценуваат како најдолгата досега, траејќи 15 часови, вклучително и кусите паузи. Главното прашање, на кое одговорот со нетрпение го очекуваа бројните новинари, беше дали воопшто претставниците на Вашингтон и Москва ќе успеат да постигнат согласност за начинот за решавање на сириската криза.

Претходно најдолгите преговори меѓу Лавров и Кери се одржаа во јули во Москва кои траеја 12 часови и на кои присуствуваше и специјалниот пратеник на ОН за Сирија, Стеган де Мистура.

Според извори од руската делегација, на преговорите во Женева пет часа се очекувал одговорот од американската страна во врска со рускиот предлог за решавање на сириската криза.

Тие предлози, според соговорникот на агенцијата РИА, биле испратени во Вашингтон, а Лавров рекол дека се надева оти ќе добие одговор на нив пред во Вашингтон да одат на спиење.

„На нашите пријатели им беа потребни пет часови да се договорат со Вашингтон. Мислам дека за нив беше важно да се усогласат со Вашингтон. Се извинувам за доцнењето, но ние тука не можевме многу да сториме“, им изјави Лавров на новинарите во Женева.

На заедничката прес конференција Кери и Лавров преставувајќи го планот за идните преговори, истакнаа дека ќе бидат истрајни на договореното, но само доколку власта и опозицијата во Сирија можат да истраат на своите ветувања.

Една од поважните одредби од договорот е што воздухопловните сили на сириската армија нема да можат да изведуваат борбени летови над териториите коишто се под контрола на вооружената опозиција.

„Овој чекор е од клучно значење во овој договор. И воздушните удари од режимот на Асад треба да сопрат, со цел да се спречи ширење на насилствата. Тоа претставува клучен елемент. Особено е неопходно вооружените сили на режимот на Асад, исто така, да ги прекинат своите дејствија, доколку не постои јасна поделба меѓу ан-Нусра и Исламската држава, и се спроведува ткн неселективно бомбардирање при што страда цивилното население“, реч Кери.

Шефот на американската дипломатија, исто така, истакна и дека прекинот на огнот треба да биде проширен и на Алепо, оти во спротивно договорот меѓу САД и Русија за Сирија ќе биде загрозен.

„Неопходно прекинот на огнот да се прошири и на Алепо (каде што владините сили помогнати од локалните милиции и шиитски доброволци од регионот се подготвуваат да ги заземат и преостанатите квартови под контрола на бунтовниците – з.р.) за да се избегне враќањето наназад во преговорите… Станува збор за воспоставување демилитаризирана зона што е можно поскоро, поради продолжување на хуманитарните операции“, изјави државниот секретар на САД.„Доколку групите на законската и легитимна опозиција сакаат да ја сочуваат својата легитимност, мора на секој начин да се дистанцираат од Џебхат ан-Нусра и од Исламската држава“, додаде Кери. Според него, тоа разграничување ќе биде поддржано од посебен експертски центар во кој ќе има воени и разузнавачи експерти, кои ќе го надгледуваат и прекинот на огнот.

Меѓутоа, истакна Кери, за да започне дијалогот меѓу завојуваните страни ќе бидат потребни најмалку седум дена и целосно прекинување на борбените дејствија на територијата на целата земја./крај/мф/сн

Извор: Макфакс