Египетските власти ја пронашле црната кутија на рускиот авион „Airbus A321“ кој во саботата утрото се урна на Синајскиот полуостров, при што загинаа сите 224 патници и членови на екипажот, од кои 25 деца, соопшти кабинетот на египетскиот премиер Шериф Исмаил.

Црната кутија ќе ја анализираат експерти, се наведува во соопштението, во коешто се прецизира дека војската досега префрлила 129 тела во мртовечниците во неколку болници во египетската престолнина Каиро. Истовремено заменикот министер за правда Шабан ал-Шами изјави дека им се предадени 34 тела на загинатите над кои експертите започнале ДНК анализа за утврдување на идентитетот.Египетскиот министер за воздушен сообраќај, Хосам Камил, изјави за електронското издание на дневниот весник al-Ahram дека пилотот на рускиот авион не испратил повик за помош, туку комуникацијата меѓу него и египетската контрола на летањето била нормална и непрекината додека авионот ненадејно исчезнал од радарот.Претходно египетската служба за контрола објави дека по 23 минути од полетувањето од аеродромот во летувалиштето Шарм ел-Шејк, откако релативно без проблеми достигнал до 9.400 метри што била височината на неговиот лет до Санкт Петербург, пилотот побарал слетување во Каиро поради дефект на радио уредот. Потоа врската била прекината..Руските истражни органи земаат мостри од горивата од компаниите од кои претходно бил полнет авионот. Исто така, направено е пребарување во просториите на компанијата „Когалмавиа“ на која ѝ припаѓал урнатиот авион, како и на неколку туроператори, при што е одземена документација. Телевизијата НТВ објави разговор со поранешната сопруга на вториот пилот на авионот, Сергеј Трухачев, која тврди дека тој се жалел на техничката состојба на авионот пред летот. „Постарата ќерка се слушнала со него пред да полета. Тој се жалел пред летот дека техничката состојба на воздухопловот бара само да посака сé најдобро“, рече жената во телевизискиот прилог.Француското Биро за истражување несреќи (BEA)- објави во саботата дека ќе испрати во Египет двајца свои стручњаци и шест технички советници од производителот на авионот „Airbus“, од каде претходно објавија дека авионот бил стар 18 години и минал 56.000 часови лет,  за да учествуваат во истрагата за несреќата на рускиот авион.На таа екипа ќе ѝ се придружат и двајца иследници од BFU, германското биро за истражување несреќи кои исто така го претставуваа производителот, и четворица иследници на МАК, руската комисија за истражување несреќи во сообраќајот.,соопшти BEA.Иако руските воздухопловни компании објавија дека нема да ги прекинат своите летови по истата рута која води над Синајскиот полуостров, неколку големи светски воздухопловни компании привремено ги пренасочија летовите за да ја избегнат областа во која се урна рускиот авион. Така, „Air France“ од саботата попладнето не лета преку Синај, додека не биде донесена поинаква одлука, изјави за AFP портпаролката на компанијата. „Таа мерка е преземена во очекување на објаснување на причините за падот на авионот“, додала.И германската компанија „Lufthansa“ следниот период нема да лета преку Синај, соопшти една од портпаролките на компанијата за дневниот весник Die Welt, напоменувајќи дека таа мерка е донесена од безбедносни причини додека не се дознаат причините за падот на авионот, за кој одговорноста ја презема во објава на Twitter џихадистичката група Исламска држава, чиј египетски огранок Ансар ал-Бејт ал-Макдс (Бранителите на Ерусалим), има засолништа на Синајскиот полуостров кои се под постојани напади на египетската војска.Египетските и руските власти ја отфрлија верзијата дека патничкиот авион бил соборен со ракета истрелана од терористите, сметајќи ја за малку веројатна поради тоа што авионот летал на голема височина и за негово соборување е потребен моќен ракетен систем./крај/мф/сн

Извор: Макфакс