Американскиот државен секретар Џон Кери изјави оти се надева дека следниот петок е можно да се одржи нов поголем меѓународен состанок за решавање на судирот во Сирија, додека неговиот руски колега Сергеј Лавров оцени дека по состанокот на ткн „квартет за Сирија“ во петокот во Виена претставниците на САД, Русија, Турција и Саудиска Арабија, се согласни дека решавањето на ситуацијата во оваа блискоисточна криза треба да се одвива според ткн Женевски договор од пред повеќе од три години.

„Денеска договоривме со сите страни дека ќе се обидеме можеби веќе следниот петок да се одржи поширок состанок со надеж во покренување на политичкиот процес со цел да се реши сирискиот судир“, изјави американскиот државен секретар Џон Кери за новинарите, пренесува AFP.

„Целта на состанокот на четирите земји за Сирија во Виена беше обид да се пронајдат нови идеи за излегување од ќорсокакот на оваа граѓанска војна“, додаде Кери признавајќи дека учесниците се свесни дека тоа ќе биде тешко.

„Имаме заеднички цели, денеска ги потврдивме, и во тоа нема никакви сомневања – да се запре војната, поефикасна борба со терористите кои се закануваат да ја заземат земјата и поактивно и поефикасно да се промовира политичкиот процес врз принципите кои беа договорени во Женева на 30-ти јуни 2012 година“, изјави Лавров за агенцијата ТАСС по средбата на која учествуваа и шефовите на допломатиите на Турција и на Саудиска Арабија, Ферудун Синерлиоглу односно Адел ал-Џубејир.

„Многу е важно што сите наши партнери денеска, и американските, и турските и саудиските, ја потврдија приврзаноста на Женевскиот договор… Во кој е јасно кажано дека сите политички реформи треба да бидат решени преку широк дијалог, во кој ќе биде претставен целиот спектар на сириското општество, и владата и опозицијата, и оти одлуките треба да се засноваат на заемна согласност. Тоа е клучот на успехот“, заклучи Лавров.

Едно од суштинските прашања во кои се разликуваат САД и Русија е иднината на сирискиот претседател Башар ал-Асад. Вашингтон и неговите европски и сунитски сојузници сметаат дека мир не може да се постигне доколку на власт е Асад и оти процесот на политичка транзиција треба да се одвива без него. Москва, пак, смета дека во дијалогот меѓу завојуваните сириски страни треба да учествуваат сите политички фактори, и оти за иднината на Асад мора да решава само сирискиот народ.

Кери, и покрај разликите во ставовите, виенската средба ја оцени како конструктивна. Прецизираше дека засега не станува збор Иран да учествува на идниот дипломатски состанок, додека Лавров рече дека е потребно да се прошири списокот и на други земји, при што го вклучува Иран, а особено ги издвојува и постојаните членки на Советот за безбедност при ОН, како и регионалните фактори како Египет, Катар, Јордан и Обединетите Арапски Емират. Сепак, Лавров истакна дека не треба во недоглед да се проширува таа листа.

Високата претставничка на ЕУ за надворешна и безбедносна политика, Федерика Могерини, која допатува во Виена поради состанокот на квартетот за Блискиот исток, изјави дека се надева дека Иран ќе може да биде дел од преговарачкиот процес за Сирија./крај/мф/сн

Извор: Макфакс