На иницијатива на британската страна во четвртокот се одржа телефонски разговор меѓу рускиот претседател Владимир Путин и британскиот премиер Дејвид Камерон, кој претходно изјави дека неговата земја и Египет тесно соработуваа во врска со несреќата на рускиот патнички авион на Синајскиот полуостров во кој загинаа 224 патници и членови на екипажот.

„Челниците разменија мислења за ситуацијата во врска со падот на рускиот авион над Синајскиот полуостров. Владимир Путин истакна дека во оцените за причината на несреќата неопходно е да се оперира со податоци кои ќе бидат појаснети и расчистени во текот на официјалната истрага“, се наведува во соопштението на Кремљ во кои се додава дека рускиот претседател и британскиот премиер ја искористеле можноста и да дискутира за „заедничката борба против тероризмот“.

Претходно во четвртокот британскиот премиер Дејвид Камерон најави дека ќе разговара со рускиот претседател за ситуацијата околу безбедност на летовите Шарм-ел-Шејк од каде што полета рускиот патнички авион со туристи кој се урна во саботата и појасни зошто Лондон ги забрани летовите на своите воздухопловни компании во египетското летувалиште.

„Разговараме за ситуацијата со европските колеги, со Американците. Наскоро ќе му се јавам и на претседателот Путин, за да ја разгледаме ситуацијата и со него“, рече Камерон.

На прашањето зошто британските воздухопловни компании ги сопреа летовите во Шарм-ел-Шејк и обратно, Камерон истакна дека владата ја донела оваа одлука врз основа на разузнавачките информации и стручни мислења.

„Сето ова ќе го разговараме со Путин и ќе му објаснам зошто ги преземавме овие мерки. А тоа како мерки ќе бидат преземени во врска со руските туристи, тоа ќе го решава тој“, изјави британскиот премиер.

„Мојата задача е да се преземат сите неопходни мерки за да се заштитат интересите на британските граѓани“, рече Камерон ветувајќи дека ќе стори „сé што е можно да бидат вратени дома“ Британците коишто останаа во летувалиштето. Вети притоа дека тоа ќе го стори „што е можно поскоро“.

Последните три дена три земји, Велика Британија, Ирска и Холандија објавија дека го суспендираат летањето на своите воздухопловни компании за Шарм-ел-Шејк.

Камерон, исто така, изјави дека неговата земја и Египет тесно соработуваат во случајот на падот на рускиот авион. На заедничката прес-конференција со египетскиот претседател Абдел Фатах ал-Сиси во Лондон, Камерон настојуваше да ги ублажи можните тензии предизвикани од одлуката да се сопрат сите летови кон Шарм-ел-Шејк.

„Интензивно соработуваме и неизмерно сум благодарен на сите напори кои досега ги вложија египетските власти“, изјави Камерон за новинарите. Нагласи дека Британија ќе преземе порешителен пристап во решавањето на секој вид екстремизам.

Египетскиот претседател ал-Сиси, кој имаше работен ручек со Камерон, изјави дека на Египет пред 10 месеци му било упатено барање за проверка на безбедноста на споменатиот аеродром.

„Ја разбравме нивната загриженост, бидејќи навистина ги интересира безбедноста на нивните граѓани“, рече Сиси истакнувајќи дека „Египет е целосно подготвен на соработка со сите пријатели“ за да се гарантира безбедноста на сите странски туристи. Поздравувајќи го „големото заемно разбирање“, египетскиот претседател изрази надежи во „што поскоро“ враќање во нормала.

Египетскиот претседател Абдел Фатах ал-Сиси во интервјуто за британскиот весник The Daily Telegraph од средата ја критикуваше верзијата за можен терористички чин, велејќи дека таквите извештаи се „избрзани и не се темелат врз вистинити факти“.

Во Лондон претходно во четвртокот својот потег го објаснија со „сериозните сомневања“ дека причината за падот на рускиот патнички авион била детонација на експлозивна направа во авионот. Во средата американската телевизија CNN и агенцијата Associated Press, повикувајќи се на американски разузнавачки извори, објавија дека за веројатна причина на падот се смета експлозија на бомба. Притоа, беше нагласено дека тоа не може да се смета за конечен и официјален заклучок на американското разузнавање, а Стејт департментот истакна дека медиумските извештаи „не го одразуваат официјалниот став“ на Вашингтон во врска со трагедијата.

Во меѓувреме рускиот Центар за судска медицина објави дека стручњаците од Русија и Египет за време на прелиминарните истражувања на телата на жртвите не нашле на траги од надворешни повреди на телата, и никакви траги од можена експлозија. Руската служба за безбедност во сообраќајот, исто така, објави дека руско-египетските стручни тимови ќе ги прегледаат повторно деловите од урнатиот авион, товарот, како и личниот багаж и облеката на патниците, со цел да се утврди дали во авионот се внесени потенцијално опасни или експлозивни супстанции.

Од друга, од руската техничка комисија кои ја истражуваат несреќата, истакна дека појавата на протекување на информации во медиумите, коишто наводно се повикуваат на извори блиски на истрагата негативно влијаат врз текот на целата истрага./крај/мф/сн

Извор: Макфакс