Рускиот претседател Владимир Путин ги потврди намерите да ја продолжи соработката со сирискиот претседател Башар ал-Асад во борбата против тероризмот, изјави шефот на сириската дипломатија Валид Муалем кој во средата првпат се сретна со рускиот челник зад затворени врати и разговараше за покренување на мировниот процес, што го потврди подоцна и рускиот министер за надворешни работи Сергеј Лавров по средбата со колегата од Сирија.

Во кусото соопштение Кремљ само наведе дека рускиот претседател Владимир Путин и сирискиот министер за надворешни работи Валид Муалем во Сочи „разговарале за руско-сириските односи“.

„За мене претставуваше голема чест да се сретнам со Путин, а средбата беше многу продуктивна. За време на средбата Путин ја потврди намерата да ги развива односите со Асад со цел да се искорени тероризмот“, изјави Муалем за новинарите по средбата, пренесе РИА Новости.

Москва треба да ја покрене новата рунда мировни преговори меѓу владата на сирискиот претседател алавитот Башар ал-Асад и делот од сунитската опозиција, кои западнаа во ќорсокак речиси десет месеци по мировната конференција ткн Женева 1 од 2012 година и Женева 2 од јануари и февруари 2014 година.

Фактот што Путин ја прими сириската делегација, првпат од избувнувањето на сирискиот конфликт во март 2011 година кој прерасна во секташки судир, ја покажува важноста која рускиот претседател ѝ ја придава на оваа посета, бидејќи досега контактите меѓу Дамаск кој е единствениот стратешки сојузник на Москва на Блискиот исток, вообичаено ги водеше шефот на руската дипломатија Сергеј Лавров, коментираат западните медиуми.

Лавров, исто така, најверојатно присуствувал на средбата меѓу Путин и Муалем, но тоа остана нејасно. Рускиот дипломат по средбата изјави дека Русија и Сирија се согласни дека тероризмот е главната закана за стабилноста на Блискиот исток.

„Русија ќе продолжи да ја поддржува Сирија во соочувањето со таа закана“, изјави Лавров.

„Борбата против тероризмот мора да се спроведува без двојни стандарди, а во врска со тоа се поставува прашањето за коалицијата којашто ги изведува воздушните напади врз Исламската држава без согласност на Дамаск. Отвореното идеологизирано одбивање на САД (да соработува со Дамаск) изгледа неадекватно во заднината на успешното завршување на отстранувањето и уништувањето на хемиското оружје од Сирија, што ја потврдува подготвеноста за договори на Дамаск“, рече Лавров, пренесе агенцијата ТАСС.

„Ги осудуваме обидите да се искористат терористичките групи за промена на власта во Сирија“, истакна Лавров алудирајќи на досегашната отворената поддршка за сириската сунитска опозиција во егзил и на боиштата од страна на земјите од регионот и од Западот и премолчувањето дека таа соработува од 2011 година со радикалните сунитски исламистички групи на различни сектори на сириското боиште против силите лојални на владата на Башар ал-Асад, како Исламската држава и Фронтот ан-Нусра кои во 2014 година се прогласени за терористички организации. „Москва и Дамаск се единствени во ставот дека борбата против тероризмот и екстремизмот е најважниот фактор за настаните на Блискиот исток“, порача шефот на руската дипломатијата.

Руското министерство за надворешни работи потврди во соопштение дека на средбата било разговарано за покренување на мировниот процес. „Проблемот на промовирањето на политичкиот процес во Сирија беше во фокусот на средбата“, се наведува во соопштението на руската дипломатија.

Русија, како главен сојузник на Башар ал-Асад, повторно ќе ја предложи московската платформа за контактите меѓу функционерите на сириската владата и широкиот спектар политички и социјални сили во сириското општество, прецизираше руското министерство за надворешни работи. Во минатото во Москва беа организирани неколку вакви средби, кои пропаднаа поради исклучивоста во прв ред на сириската опозиција која бара неизоставно заминување од власта на Асад, и не беа постигнати повидливи ефекти.

„Имаме многу прашања за политичкото решение во Сирија и не можеме да разговараме без Сиријците. Затоа оваа посета е важна“, изјави за РИА Новости заменикот на рускиот министер за надворешни работи, Сергеј Рибкин.

Барањето на Дамаск да биде забрзана испораката на руските противвоздушни ракетни системи „С-300“, поради стравувањето дека воздушните напади на меѓународната коалиција предводена од САД врз позициите на Исламската држава во североисточна Сирија без координација со Дамаск подоцна може да се претвори во операција против силите на претседателот Асад, исто така, може да биде тема на разговорите во текот на посетата на Муалем којашто завршува во четврток, пишуваат руските медиуми./кај/мф/сн

Извор: Макфакс