Рускиот претседател Владимир Путин, која престојува во Индија на самитот на земјите од групата БРИКС, одговарајќи на новинарски прашања одговори дека Русија не е таа којашто бара судир со САД и оти не се обидува да влијае врза американските претседателски избори, пренесуваат агенциите.

На крајот од дводневниот самиот на челниците на држави од БРИКС (Бразил, Русија, Индија, Кина и Јужноафриканската Република), рускиот претседател Владимир Путин во индиската сојузна држава Гоа рече дека ќе соработува со кој и да е челник на САД кој ќе има желба да соработува со Русија отфрлајќи ги обвинувањата дека Москва го помага републиканскиот кандидат Доналд Трамп.

Путин, исто таа, ги отфрлил американските закани дека ќе одговорат на наводните руски хакерски напади и оти ќе извршат кибернетички напад врз Москва и врз цела Русија, велејќи дека таквите изјави само потврдуваат дека Вашингтон ги користат кибернетичките напади за политички цели.

Рускиот челник, рече и дека таквите закани кои дојдоа од потпретседателот на САД Џозеф Бајден не покажале ништо ново, „бидејќи е познато дека тие секого шпионираат и секого прислушуваат“ и „ не само потенцијалните непријатели, туку и своите најблиски сојузници“.

Портпаролот на Кремљ, Дмитриј Песков, претходно изјави дека тавата закана од Бајден е без преседан во меѓународната комуникација и додаде дека Русија ќе ги преземе сите мерки на претпазливост и заштита.

Путин изразил надеж дека билатералните односи меѓу Русија и САД ќе се подобра по американските претседателски избори на 8-ми ноември.

„Би сакал да ве уверам сите, вклучително и нашите американски партнери и пријатели, дека немаме намера да се мешаме во американската предизборна кампања“, рекол рускиот претседател, истакнувајќи дека „играјќи на руската карта“, американската администрација сака да ги прикрие своите неуспеси, како што се големиот државен долг, слабата дипломатија на Блискиот исток и напнатите односи со сојузниците во тој регион.

„Доколку некој сака конфронтација, тоа не е нашиот избор. Напротив, би сакале да најдеме заеднички јазик и да соработуваме во решавањето на глобалните проблеми со коишто се соочени и Русија и САД“, порачал Путин.

На прашањето дали односите меѓу Русија и САД се влошиле поради Сирија, Путин одговорил дека сето тоа започнало со распадот на Југославија

„Грешите, сетете се што се случуваше во Југославија. Од таму сето започна. Патем, Борис Елцин беше посебен. Кога зазема прилично цврст став по прашањето на Југославија, веднаш сите започнаа да се присетуваат дека сакаше да пивне. Така започна дискредитирањето. Ете, од таму сето започна“, рекол Путин.

Русија во неделата објави дека сите учесници на состанокот во Лозана се согласиле дека Сиријците би требало самите да одлучуваат за својата иднина преку инклузивен дијалог, како и дека земјата би требала да остане цела, откако саботниот состанок во Швајцарија заврши без конкретни резултати.

Руското министерство за надворешни работи објави дека за да заживее прекинот на огнот во Сирија, сириската сунитска вооружена опозиција којашто ја поддржуваат САД и нивните регионални сунитски сојузници и ја сметаат за умерена, мора да се дистанцира од исламистичката групација Џебхат ан-Нусра, сириското крило на Ал Каеда, која го промени името во Џебхат Фатех ал-Шам, и од другите блиски „терористички“ групи“.

„Истовремено, треба да биде јасно дека операциите против терористите на Исламската држава и Џенбхат ан-Нусра ќе продолжат“, порача руската дипломатија.

На состанокот во саботата во Лозана, кој го свика американскиот државен секретар Џон Кери не беше постигнат, како и што се очекуваше, договор за заедничка стратегија со Русија за запирање на војната во Сирија, која започна во март 2011 година./крај/мф/сн

Извор: Макфакс