Русија нема да толерира вакви злосторства како што беше нападот врз рускиот „Су-24“, за кој Турција тврди дека е соборен во нејзиниот воздушен простор, додека Москва тврди дека е нападнат над Сирија, порача рускиот претседател Владимир Путин и истакна дека руската страна „се разбира, внимателно ќе го анализира она што се случило, а денешниот трагичен настан ќе имаа сериозни последици за руско-турските односи“, обвинувајќи ја Турција дека ѝ зарила „нож во грбот“ на Русија во борбата против терористите, посочувајќи ја турската поврзаност со трговијата на Исламската држава со нафтата од Сирија и обвинувајќи ја Анкара дека прави обид НАТО да го стави во заштита на терористите.

Во изјавата за медиумите во текот на средбата во Сочи со јорданскиот крал Абдула Втори, дадена во вторникот во врска со турското соборување на рускиот борбен авион во Сирија, рускиот претседател Владимир Путин посочи меѓу другото дека Русија отсекогаш кон Турција се однесувала не како близок сосед, туку како кон пријателска држава. „Не знам кому му било потребно она што се случи, во секој случај не нам“, истакна рускиот челник.„Разбирам дека секоја држава има свои регионални интереси, и ние секогаш ги почитуваме. Но никогаш нема да толерираме такви престапи како денешниот“, рече Путин. Изрази притоа надеж дека „меѓународната заедница ќе најде сили да се обедини против заедничкото зло (тероризмот)“.Претходно во изјавата Путин нагласи дека соборувањето на рускиот „Су-24“ излегува од рамките на борбата против тероризмот, и оти тоа претставува „удар во грбот“ на Русија од страна на соучесниците на терористите. „Денешната загуба е поврзана со ударот што ни го нанесоа зад грб поддржувачите на тероризмот“. Поинаку не можам да го квалификувам тоа што се случи денеска“, рече рускиот челник. Соопштувајќи ги пред новинарите податоците од руското министерство за одбрана дека рускиот авион бил соборен над територијата на Сирија со ракета „воздух-воздух“ истрелана од турски „F-16“ кога „Сухој-от“ бил на височина од 6.000 метри и на оддалеченост од еден километар од турската граница, Путин заклучи дека рускиот воздухоплов изведувал операции против џихадистичката Исламска држава и оти е очигледно дека тој не претставувал никаква закана за Турција.Меѓутоа Путин не пропушти да го истакне она што повремено го пишува западниот печат, односно дека одамна е утврдено дека во Турција се доставува нафта од областите во Сирија кои се под контрола на терористите.„Одамна го имаме утврдено тој факт, дека на територијата на Турција заминуваат големи количества нафта и нафтени производи од териториите кои го контролира Исламската држава“, рече Путин. Според него од тука произлегувала и „најголемата финансиска поткрепа за злосторничката група“. „Сега уште и нé удираат в грб, ги напаѓаат нашите авиони кои се борат против тероризмот“, продолжи Путин.Истакна и дека нападот на Турција врз рускиот „Су-24“ се одиграл и покрај фактот дека „со американските партнери потпишавме договор за спречување на инцидентите во воздухот (над сирија), а Турција како што е познато е меѓу оние кои изјавија дека војуваат, наводно, со тероризмот во составот на американската коалиција“.„Доколку Исламската држава има толку пари, а се смета со десетици, стотици милиони, а можеби и милијарди долари, тие потекнуваат од трговијата со нафта, а и покрај тоа тие имаат заштита од страна на вооружените сили на цели држави, тогаш е разбирливо зошто тие се однесуваат толку дрско, зошто ги егзекутираат луѓето на најѕверски начини, зошто тие извршуваат терористички напади по целиот свет, вклучително и во срцето на Европа“, рече Путин.Оцени дека обраќањето на Турција до нејзините партнери од НАТО во врска со инцидентот со рускиот авион укажува на обид да се стави Алијансата во служба на Исламската држава. Путин истакна дека по инцидентот со рускиот бомбардер „наместо да стапат веднаш во неопходниот контакт со нас, како што е познато, турската страна се обрати до своите партнери во НАТО за разгледување на тоа прашање“.„Што ќе беше доколку ние урневме нивен авион, а не тие наш?… Сакаат ли НАТО да го стават во служба на Исламската држава?“, рече Путин./крај/мф/сн

Извор: ТАСС