Русија не планира да распореди во овој момент свои војници во Сирија изјави рускиот претседател Владимир Путин во разговорот со американскиот новинар Чарли Риуз во интервјуто за мрежите CBS и PBS, пред неговата средба во понеделникот со американскиот колега Барак Обама, од што стравуваат САД кои го посакуваат заминувањето од власт на сирискиот претседател Башар ал-Асад, чиј сојузник е Москва.

Целта на руската воена помош и присуство во Сирија е поддршка за владата на претседателот Башар ал-Асад во борбата со терористичките групации, изјави рускиот претседател Владимир Путин. Тој подоцна во понеделник треба да се сретне и со иранскиот претседател Хасан Роухани, кој исто така истакнува дека Асад мора да биде дел од меѓународната коалиција против радикалните сунитски исламски милитанти.

„Русија нема да учествува ни на кое поле во операциите на територијата на Сирија или на други држави. Барем засега тоа не го планираме“, изјави Путин.

Една од главните теми на разговорот меѓу Путин и Обама ќе биде меѓународната коалиција против Исламската држава, при што Москва инсистира во неа да биде вклучен и официјален Дамаск и оти за таквата операција мора да има резолуција од Советот за безбедност од ОН.

„Нема поинаков начин да се реши сирискиот проблем без да се зајакне постојната легитимна влада, да биде подржана во борбата против тероризмот“, вели Путин кој пред Генералното собрание на ОН треба да ја објави својата иницијатива за војната против џихадистичката терористичка Исламска држава во којашто ќе бидат вклучени земјите од регионот, а ќе разговара и со Роухани кој во Њујорк изјави дека владата на Асад „не смее да биде ослабена“ доколку сакаме да ги победиме радикалните милитанти, како Исламската држава.

Русија потврди дека ја засилила својата воена помош за Сирија со најмодерно оружје, а засега неименувани функционери САД тврдат дека испратила борбен авиони, тенкови, оклопни возила, па дури и дека ставила 200 свои маринци во покраината Латакија каде што наводно градела современа воздухопловна база.

Брзото трупање на воена опрема што ја демонстрира цврстата поддршка на Москва за владата во Дамаск, како и незапаметената бегалска криза од Сирија којашто ја преплави Европа, ја предизвикаа итната неопходност од решавањето на веќе петгодишната сириска граѓанска војна.

Путин, притоа, појасни дека и за Русија постојат закани од радикалниот исламизам, особено во кавкаските републики Чеченија, Дагестан и Ингушетија, каде што Западот ги поддржуваше како сепаратисти занемарувајќи го фактот за исламистичкиот карактер на овие бунтовници кои прогласија ткн „Кавкаски емират“.

„Има повеќе од две илјади милитанти од просторот на поранешниот Советски сојуз во Сирија, и наместо да чекаме да се вратат дома, би требало да му помогнеме на претседателот Асад да се бори против нив таму, во Сирија“, смета Путин.

Во долгото интервју коешто опфаќа теми од историјата на неговото семејство, украинската криза и др, Путин ја оцени како нелегални и неефикасна интервенцијата на САД со воздушни напади во Сирија и особено поддршката на сунитските опозициски групи во Сирија кои Вашингтон ги смета за „умерени“ и ги повтори потврдите и на американските функционери дека борците коишто ги увежбува и вооружува американсакта армија го предаваат оружјето и минуваат во редовите на џихдистичките организации./крај/мф/сн

Извор: Макфакс