Рускиот претседател Владимир Путин смета дека е нецелисходно да се продолжат нападите врз бунтовничките позиции во северниот сириски град Алепо од страна на руската авијација, објави во петокот неговиот портпарол Дмитриј Песков, коментирајќи го барањето на Генералштабот на руската армија до шефот на државата кој воедно е и врховен командант да се продолжат нападите во источните квартови од градот, пренесуваат агенциите.

„Претседателот на Русија смета дека сега не е соодветно да се обноват воздушните удари во Алепо“, изјави портпаролот на Кремљ, Дмитриј Песков додавајќи Владимир Путин дека во моментов е неопходно „да се продолжи со хуманитарниот прекин“ којашто цивилите, ранетите и милитантите кои тоа го сакаат, може да го напуштат источниот дел од Алепо.

„Уште повеќе, да им се овозможи на нашите американски партнери да ги извршат своите ветувања и обврски во врска со раздвојувањето на ткн умерена опозиција од терористичките групации“, истакнал Песков.

Претходно во петокот Генералштабот на руската армија побара од Путин дозвола за продолжување на воздушните удари во Алепо, по десетдневната пауза, поради офанзивата на сириските бунтовници врз владините сили во овој втор по големина сириски град со цел да ја пробијат блокадата на источните квартови.

„Додека цивилите и натаму гинат, а бунтовниците ги продолжуваат борбите со владините сили, побаравме од врховниот командант на руските вооружени сили даги продолжи воздушните удари (…) во источниот дел од Алепо“, изјави на прес-конференција генералот Сергеј Рудцкој, од главниот руски штаб за операциите во Сирија.

Сириските опозициски бунтовници кои ги поддржува Западот заедно со џихадистите започнале во петокот противнапад со цел да ја пробијат блокадата на сириската владина војска и нејзините сојузнички локални милиции за да ја прекинат опсадата на источните квартови на северниот град Алепо, јавува BBC. Напади врз владините сили засега ги вршат бунтовниците кои се надвор од Алепо, и наводно оние кои се наоѓаат во опсада во источните квартови имаат намера да им се придружат.

„Сите револуционерни фракции без исклучок учествуваат во борбите“, изјавил воениот портпарол на фракциите Фастаким во градот, пренесе агенцијата Associated Press. Оваа фракција ја вклучува и групата Џебхат Фатех ал-Шам, поранешната Џебхат ан-Нусра, сириското крило на Ал Каеда, којашто е ставена на листата терористички организации на Обединетите нации како и Ахрар ал-Шам.

Поради тоа Песков за новинарите во Сочи прецизира дека поради „планираното интензивирање на нападите од страна на милитантите кои веќе минаа во активна фаза на операции“, Путин предвидува дека во услови на крајна неопходност за спречување на провокациите од страна на терористичките групации „руската страна го задржува правото да ги користи сите средства за да обезбеди соодветно ниво на поддршка на сириските сили“.

Портпаролот на Кремљ изјави дека одлуките за натамошните активности ќе бидат преземани „во зависност од ситуацијата“.Истакна дека ќе бидат земени предвид ставовите на Генералштабот и информациите кои доаѓаат директно од Сирија.

Песков не може да каже до кога ќе трае ткн „хуманитарна пауза“, но нагласи дека „овој рок одамна е надминат“, но повторно вели дека тоа зависи од напорите на САД да влијаат врз опозициските групи да се дистанцираат од радикалните исламисти.

Русија на 18-ти октомври ги прекина воздушните операции во Алепо поради „хуманитарното примирје“, коешто требаше да го овозможи извлекувањето на цивилите и ранетите, како и повелување на бунтовниците. Меѓутоа, досега се извлекле само стотина цивили преку осумте хуманитарни коридори кои за таа цел беа отворени и на кои чекаат возила на Црвениот крст и на ОН. Владата во Дамаск соопшти дека милитантите не им дозволуваат на цивилите, чиј број ОН го проценува на 270.000 да ги напуштат опсадените квартови.

„Руските сили ги преземаат сите мерки со цел да се стабилизира ситуацијата во Алепо“, изјави генералот Рудцкој, давајќи дека хуманитарните коридори се отворени 24 часа и дека автобусите и амбулантните возила се на теренот поради извлекување на цивилите и ранетите.

„Имаме желба даги проучиме сите предлози за подобрување на хуманитарната состојба во Алепо, па и воведување хуманитарно примирје, но од него не смеат да имаат полза само милитантите“, додаде рускиот генерал, потсетувајќи дека во претходните вакви примирја бунтовниците ги искористиле да се прегрупираат и да се вооружат./крај/мф/сн

Извор: Макфакс