Рускиот претседател Владимир Путин, во друштво на турскиот, палестинскиот и пакистанските претседатели Реџеп Тајип Ердоган, Махмуд Абас односно Мамнон Хусаин и други светски челници, во средата ја осуди џихадистичката организација Исламска држава (IS) во говорот по повод отворањето на најголемата московска џамија која може да прими до десет илјади верници, пренесуваат агенциите.

„Гледаме што се случува на Блискиот исток, каде што терористите на ткн Исламска држава ја срамотат оваа голема светска религија исламот. Тие ги убиваат луѓето, па и свештеници, и варварски ги уништуваат спомениците на светската култура. Нивната идеологија се темели на лаги, на сквернавење на исламот“, истакна рускиот претседател Владимир Путин во обраќањето во централната московска џамија заблагодарувајќи им се на руските исламски челници и свештенство за напорите што ги вложуваат да ги спречат обидите врбувања на младите во редовите на екстремистите.

Русија со децении се справуваше со исламистичкиот бунт на екстремистите во руските републики на Кавказ, в Чеченија, Дагестан и Ингуштетија, каде што последните години откако беше прогласен ткн Кавкаски калифат беа ликвидирани позначајните водачи на милитантнтите групи. Според неодамнешните процени на руските служби, до 2.500 руски државјани, претежно заминале во редовите на Исламската држава на боиштата во Ирак и во Сирија каде што дејствуваат во групација под името „Џунуд Кауказ“ (Воини на Кавказ).

Централната московска џамија е најголемиот храм на муслиманската заедница во руската престолнина која има околу двесте илјади верници. Новата џамија е подигната на место до старата, изградена во 1904 година, и била единствената активна во Москва во советскиот период. Нејзината целосна реставрација којашто опфаќа и доградби чинела околу 170 милиони долари, собрани од приватни донации, како и со помош на владите на Турција и на Казахстан. Џамијата свечено е отворена пред големиот муслимански празник Курбан бајрам.

Турскиот претседател Реџеп Тајип Ердоган во својот говор се фокусираше на влошената ситуација со бегалската криза и реакциите на неа од страна на Европската унија, велејќи дека му е „многу тешко да види како луѓето се лишуваат од правото на исповед на религијата, зачувување на своите корени и својата земја, но и основното право – правото на живот“. „Русија претставува многу јасен пример за добрососедство и мирно егзистирање под еден покрив на луѓе од разни конфесии и етничко потекло“, додаде Ердоган.

Палестинскиот челник Махмуд Абас, пак, во своето обраќање потсети на недоволната соодветна заштита на муслиманските и на христијанските светии во Ерусалим и во Палестина и ја повика меѓународната заедница да се ангажира тие да бидеа „безбедни како што беа пред палестинските територии да бидат окупирани од Израел“. Порача дека „Најостро ги осудуваме сите дејствија од страна на израелските окупациски власти да им се забрани на муслиманите пристапот до светата џамија ал-Акса“, во Ерусалим, едно од трите најсвети места на исламот, на Платото на џамијата, кое Евреите го нарекуваат Брдото на храмот каде што се наоѓаат остатоци од древно јудејско светилиште./крај/мф/сн

Извор: Макфакс