Рускиот претседател Владимир Путин преки телевизиското обраќање во средата порача дека „враќањето дома“ на црноморскиот полуостров Крим кој во март преки референдум си ја поврати на автономијата и изгласа присоединување кон Русија што Западот го смета за руско анектирање на украинската територија, ќе остане важно поглавје во руската историја.

Руската економија се движи кон рецесија, во којашто претставува најголем предизвик за 15-годишниот предизвик за претседателот Владимир Путин, бидејќи Западот воведе санкции против Русија и притиска за намалување на цените на нафтата која е главниот руски извозен производ. Но пораката на Путин има силна поддршка во Русија во чијашто историја Крим е длабоко врежан со жртви во многуте војни и отсекогаш се сметал за дел од Русија поради заедничката историја и мнозинското руско население таму.

„Љубовта кон татковината е едно од најсилните и највозвишените чувство. Се гледа во полноста и братската поддршка на народот на Крим и Севастопол, кога резолутно одлучија да се вратат дома“ Тој настан засекогаш ќе остане во нашата историја како многуважен период“, рече Путин.

Крим кој во комунистичката историја на Советскиот сојуз административно е пренесен во составот на Украина како автономна република, автономија која е укината во 1990-те со осамостојувањето на Киев, во март се побуни откако прозападните преку крвави протести го соборија претседателот Виктор Јанукович кој беше обвинет за свртување на земјата кон Москва, и тамошно доминантно руско и рускојазично население се реши да се присоедини кон Руската Федерација, што предизвика повеќекратни санкции од Западот и заладување на односите не нивото од крајот на блоковската Студена војна.

Сепак, неподелен е впечатокот што го илустрираат и анкетите, дека популарноста на Путин се зголеми уште повеќе поради неговите цврсти ставови во украинската криза, но Западот предупредува дека економската криза, како резултат на неговите санкции токму поради ваквите ставови на рускиот претседател, претставува закана за стабилноста и развојот на Русија, очекувајќи дека тоа ќе го поткопа неговиот углед.

Економистите предвидуваат дека следната година руската економија ќе падне за околу 4,5 отсто, доколку просечната цена на нафтата остане на нивото близу 60 долари за барел

„Годината ќе биде онаква каква што ние ќе ја направиме. Мораме да го исполниме, да го спроведеме сето она што го планиравме поради нас самите, поради нашите деца и татковината“, порача Путин.

Новогодишната порака на Путин беше пренесена преку државната телевизија прво на Далечниот исток, повеќе часови пред да биде емитувана во Москва, каде што вообичаено се емитува непосредно пред полноќ.

Во една од пораките до своите странски колеги, Путин му се обрати и на украинскиот претседател Петро Порошенко, кому му ја честиташе Новата година изразувајќи надеж за „плодна соработка на настапувачката 2015 година“.

Рускиот претседател им упати новогодишни честитки и на другите светски лидери, како што се германската канцеларка Ангела Меркел на која ѝ порача дека се надева на продолжување на „конструктивниот дијалог“, и јакнење на партнерството меѓу двете земји, на турскиот претседател Реџеп Тајип Ердоган, папата Франциск, на латиноамериканските лидери и на десетици меѓународни организации меѓу кои и на Меѓународниот олимписки комитет.

Во пораката до американскиот претседател Барак Обама, Путин го потсети американскиот колега дека во 2015-та се одбележуваат 70 години од крајот на Втората светска војна, порачувајќи му дека во неа „двете земји се бореа рамо до рамо со сојузниците“. Според Путин, овој историски датум потсетува на одговорноста што ја имаат Русија и САД за одржување на мирот и меѓународната стабилност, „Руско-американското партнерство може да се развива успешно само доколку е темелено на еднакви права и заемно почитување“, порача рускиот челник./крај/мф/сн

Извор: Макфакс