Русија ќе ја продолжи соработката со САД и нивните партнери во борбата против Исламската држава во Сирија, но таа соработка ќе биде доведена во опасност доколку се повтори соборување на руски авион од страна на Турција, изјави во четвртокот рускиот претседател Владимир Путин истакнувајќи дека Москва на Вашингтон му ги предала сите детали за летот на рускиот бомбардер „Су-24М“ кој во вторникот беше соборен од турски ловци „F-16“ во близина на сириско-турската граница.

Говорејќи во Кремљ по состанокот со францускиот претседател Франсоа Оланд, рускиот челник Владимир Путин јасно даде до знаење колку е лут поради потегот на Турција, повторувајќи дека уривањето на рускиот авион претставува чин на предавство од земјата којашто Русија ја сметала за пријател.Путин изрази жалење што Турција, наместо да дејствува во избегнувањето на трагедиите, како онаа со соборениот руски авион, дава нејасни објаснувања и „дури не може да се извини“. Ја исклучи можноста дека Анкара не знаела дека соборува руски авион, како што тврдеше турскиот претседател Реџеп Тајип Ердоган, бидејќи тој имал јасни ознаки.„Во однос на нашите авиони, кои наводни не ги препознавале турските воздухопловни сили, тоа е исклучено и невозможно. Тие имаат јасни ознаки…“, рече Путин за време на брифингот по разговорите со Оланд во четвртокот навечер во Кремљ.„Ќе повторам дека претходно, во согласност со договорот со американската страна, предадовме информации каде ќе дејствува нашата авијација, на кои нивоа, на кои места и во кое време“, истакна Путин.Истакна дека Русија на САД ги проследила сите детали за планот на авионот кој потоа Турција го собори. „Или Американците не контролирале што им прават сојузниците, или информациите протекуваат отсекаде“, рече Путин.Нагласи дека во овој случај Русија поаѓа од тоа што Турција е член на сегашната коалиција и „мора да знае дека таму дејствува руската авијација“ и оценувајќи дека досегашните изјави од Анкара се обични изговори. „Многу е тажно што наместо да се работи сериозно, длабоко, тоа никогаш повеќе да не се случи, слушаме нејасни објаснувања, па дури и без извинувања“, рече Путин.„Така што, тоа не е наш избор, тоа е избор на турската страна“, заклучи Путин мислејќи на тензиите меѓу Москва и Анкара по вторничниот инцидент за кој претходно оцени дека е „нож в грбот“ на Русија во борбата против тероризмот и резултат на дејствија на „поддржувачите на терористите“. „Подготвени сме да соработуваме со коалицијата под водство на САД. Но, се разбира, инциденти како уништувањето на нашиот авион и смртта на нашите војници се целосно неприфатливи“, рече Путин.„И ние поаѓаме од ставовите дека нема да има повторување на ваквите инциденти, инаку нема да имаме потреба да соработуваме со никој, со ниедна коалиција или земја“, порача рускиот претседател.Путин прецизираше дека е постигнат договор со Оланд за тоа „како да соработуваме во скора иднина на билатерална основа и со целата коалиција предводена од САД“. Појасни дека станува збор за одредување на областите на кои може да се вршат ударите, а каде би било подобро да се воздржи од нападите, како и за размена на информациите и за координирани акции.„Ние тоа го гледаме како формирање широка антитерористичка коалиција под покровителство на Обединетите нации“, заклучи Путин./крај/мф/сн

Извор: Reuters/РИА Новости