НАТО ќе ја зајакне својата присутност во своите источноевропски членки, така што на тоа подрачје ќе распореди сили кои може да реагираат на секоја закана, изјави во понеделникот генералниот секретар на Алијансата, Андер Фог Расмусен.

„Во моментов имаме значително подобрување на подготвеноста на нашите сили за брзо распоредување. Ќе го развиваме она што го нарекуваме сили за брза реакција. Тоа ќе бидат сили со многу висок степен на подготвеност, способни за распоредување во многу кус временски период“, појасни Расмусен за новинарите и додаде дека за тоа ќе биде потребна неопходна инфраструктура на територијата на земјите членки. На претстојниот самит на НАТО во Велс, истакна генералниот секретар, ќе биде донесен план за зголемената подготвеност за реагирање на кризите во која и да е точка во светот, што според него е во прв ред поврзано со руската политика кон Украина.Генералниот секретар на НАТО рече, меѓу другото, дека постои намера за квалитативно подобрување на размената на разузнавачките информации меѓу членките на Алијансата и на „ажурирање на одбранбените планови“ за сметка на почестите воени маневри. „Планот за подобрување на подготвеноста, ќе ни осигури да имаме соодветни сили и вооружување на вистинско место и во вистинско време“, прецизираше Расмусен.„Тие сили ќе ги пополнуваат сојузниците и командата со нив ќе ротира. Тие може да бројат до неколку илјади војници, подготвени да реагираат кога тоа ќе биде потребно, со воздушна и поморска поддршка, како и поддршка од командоси“, појасни генералниот секретар на НАТО, Андерс Фог Расмусен.„Тоа значи повидлива присутност на НАТО на истокот, толку долго колку што ќе биде потребно“, додаде, истакнувајќи притоа дека Алијансата со тоа нема да го прекрши договорот со Русија од 1997 година со кој се ограничува бројот на нејзините војници во регионот, но и дека тоа е поврзано со кризата во Украина. Велејќи дека НАТО е заинтересиран за „стабилна соработка“, Расмусен истакна дека жали поради тоа што Русија, според мислењето на Алијансата, гледа на сојузот како на противник. „Ние ќе се адаптираме на таквата ситуација“, заклучи Расмусен.Потенцирајќи дека единиците ќе бидат присутни во Источна Европа толку долго колку што е потребно, Расмусен појасни дека „не затоа што НАТО има намера да заштити некого, туку затоа што заканата станала поитна и конкретна. Ние ќе сториме сѐ што е потребно, за заштита на нашата Алијанса“.Расмусен рече и дека „не е подготвен да зборува за конкретни бројки, во врска со формирањето на оперативните бази“. „Тоа е дел од воената специфика која треба да биде разработена по самитот (во Велс на 4-ти и 5-ти септември). И на крајот, кој ќе плати? Тоа ќе бидат заеднички напори. Сите членки НАТО, на еден или друг начин, ќе учествуваат во финансирањето“, појасни генералниот секретар на НАТО.Притоа укажа на важноста од зголемувањето на трошоците за одбрана од страна на земјите членки на НАТО, поздравувајќи ја подготвеноста на источноевропските членки. „Тоа ќе бидат веродостојни колективни напори во духот на солидарноста“, рече челникот на Алијансата.Во саботата The Financial Times пишуваше дека Велика Британија во текот на седмицата ќе го објави создавањето на заеднички сили за брзо реагирање со седум земји членки на НАТО, но дека процесот за формирање на структурата се соочува со оддолжување. Според весникот, во формирањето на споменатите сили, покрај Велика Британија, ќе бидат вклучени и Данска, Латвија, Литванија, Естонија, Норвешка и Холандија. Се верува дека тие сили „ќе одржуваат редовни големи вежби во Европа и на други локации“, иако „деталите сѐ уште се финализираат“.Во пресрет на самитот на НАТО во Велс на 4-ти и –ти септември, британскиот премиер Дејвид Камерон како домаќин на состанокот на врвот ќе објави за новата структура на силите на земјите на Алијансата во чиј состав ќе влезат „не помалку 10 илјади војници“, истакнува весникот, според кој тие мерки се „одговор“ на активностите на Русија во Украина. Во составот на новите сили за брзо распоредување, како што се очекува, ќе влезат единици на воздухопловните, поморските и копнените војски. Тие ќе бидат подготвени како за брзо реагирање, така и за редовни вежби. Се претпоставува дека во почетокот командата ќе ја преземе Велика Британија. Притоа, според весникот, „модел за заедничките сили за брзо реагирање ќе бидат заедничките сили за брз одговор на Велика Британија и Франција, кои треба да ја достигнат целосната борбена подготвеност до 2016 година“, прецизира весникот. Како што пишуваат другите западни медиуми, Полска, Латвија, Литванија, Естонија и Канада се залагаат за отповикување на Основачкиот акт на Русија – НАТО од 1997 година. Во неделата германскиот весник Der Spiegel, таквиот чекор ќе овозможи зголемување на бројот војници, коишто Северноатлантскиот сојуз може да ги распушти на територијата на земјите од поранешниот источен блок. Весникот истакна дека официјален Берлин во оваа фаза е против таквиот чекор, но и дека „со некоја нова активност“ на Москва, таквата позиција на германските дипломати ќе стане посложена. Официјални извори од германската влада и од НАТО одбиле за весникот да ги коментираат ваквите наводи.Во неделата германскиот весник Frankfurter Allgemeine Sonntagszeitung повикувајќи на се сопствени извори пишуваше дека НАТО планира да воспостави пет бази во Источна Европа, и тоа во Латвија, Литванија, Естонија, Романија и Полска. Според сознанијата на весникот, во секоја од овие база долгорочно ќе бидат распоредени по 600 војници./крај/мф/сн

Извор: Макфакс