Турскиот премиер Ахмет Давутоглу изјави во понеделникот дека официјална Москва летањето на рускиот борбен авион го опишала како „грешка“, додека истовремено американски функционери изразија „длабока загриженост“ од инцидентот, а НАТО најави специјален состанок на оваа тема а генералниот секретар на Алијансата Јенс Столтенберг руското повредување на турскиот воздушен простор го нарече „неприфатливо“. 

Турските ловци „F-16“ во саботата пресретнале руски борбен авион кој наводно влегол во турскиот воздушен простор на сириската граница и го натерале да се врати во Сирија, но во информациите за овој инцидент отсуствуваат попрецизни информации.,Во неделата се случил уште еден инцидент во кој авион „МиГ-29“, модел кој е во составот и на руската и на сириската армија, наводно провоцирал два турски ловци „F-16“ кои патролирале покрај границата насочувајќи ги кон нив своите проектили.

Турскиот премиер Ахмет Давутоглу во разговор за телевизијата HaberTurk ја обвини Русија за ескалација на кризата во Сирија. „Утрово од Москва сме известени дека станува збор за грешка, како и дека Русија ги почитува турските граници и дека ваков инцидент повеќе нема да се повтори“, рече Давутогли порачувајќи дека Турција во иднина ќе одговори на евентуалните нови инциденти.

Анкара, исто така, побарала од Москва да „избегува повторување на ваков инцидент“ и дала до знаење дека во спротивно „Руската Федерација ќе се смета одговорна за секој несакан настан“ до кој може да дојде. Турскиот министер за надворешни работи Ферудин Синирлиоглу телефонски разговарал со рускиот колега Сергеј Лавров и му го пренел ова, се истакнува во соопштението на владата. Рускиот амбасадор во Анкара бил повикан на разговор при што му било изразен „незадоволството“.

Американски воен функционер, кој не сакал да биде именуван, рекол дека САД се „длабоко загрижени“ поради руското повредување на турскиот воздушен простор, и ја повикал Русија да се однесува на „безбеден и одговорен“ начин. Додал, исто така, дека НАТО ќе одржи состанок за да разговара на оваа тема, пренесува Reuters.

„Не верувам дека тоа било случајно“, рекол функционерот опишувајќи го инцидентот како повреда на суверенитетот на земја членка на НАТО.

Генералниот секретар на НАТО, Јенс Столтенберг, го осуди инцидентот оценувајќи го како неприфатлив. „Штотуку разговарав со турскиот министер за надворешни работи за неодамнешните воени акции на Руската Федерација во и околу Сирија, вклучително и неприфатливата повреда на турскиот воздушен простор од страна на руската авијација“, изјави.

„НАТО останува решителен во поглед на безбедноста на Турција. Денеска ќе свикам состанок на Северноатлантскиот совет (амбасадорите на земјите членки –з.м.) за да разговараме за ситуацијата. Руските акции не придонесуваат за безбедноста и стабилноста во регионот“, додаде Столтенберг.

Тој ја повика Русија да ги почитува воздушните простори на земјите членки на НАТО и да го избегнува зголемувањето на тензиите со Алијансата, и да ги усогласи своите напори со „оние во меѓународната заедница која се бори против Исламската држава“./крај/мф/сн

Извор: Макфакс