Републиканскиот сенатор Ранд Пол изјави во неделата дека она што Хилари Клинтон го покажала во текот на мандатот на државен секретар на САД ја доведува во прашање нејзината квалификуваност да се кандидира за претседател на државата, напаѓајќи ја неколку часа пред официјалното започнување на кампањата за претседателска номинација во Демократската партија за изборите во 2016 година.

Поранешната американска државна секретарка и „прва дама“ на САД, Хилари Клинтон во неделата по вторпат тргнува во трката за претседателската номинација на Демократската партија и се смета за фаворит. Првиот пат беше поразена во 2008 година од актуелниот претседател Барак Обама.

Републиканскиот сенатор Ранд Пол во неделата ги повтори своите стари критики поради пристапот што го имала Клинтон во врска со исламистичкиот напад врз американскиот конзулат во северниот либиски град Бенгази во 2012 година, кога беа убиени американскиот амбасадор и уште тројца припадници на обезбедувањето на дипломатското претставништво. Се наврати и на неодамнешните прашања во врска со странските донации за хуманитарната фондација којашто ја основаше со својот сопруг, 42-от американски претседател Бил Клинтон.

„Клинтон со познати по тоа што сметаат дека се над законите“, рече за CNN сенаторот од сојузната држава Кентаки, кој неодамна ја објави својата кандидатура за претседателската номинација на Републиканската партија и според многумина е фаворит.

Фондацијата Клинтон прифаќала донации од земји како што е Саудиска Арабија (којашто се смета за спонзор на ултраконзервативните исламски движење низ светот), „поради што тешко може да се верува дека таа (Хилари) е искрена“, рече сенаторот Пол. „Рекоа дека нема да примаат донации за Фондацијата Клинтон додека таа е државна секретарка, а се поставува прашањето дали тоа навистина го правеле“, додаде.

Фондацијата Клинтон, која се претставува како фактор на намалувањето на цените не лековите за луѓето заразени со ХИВ во земјите во развој, одговори дека соработката со странските влади е клучна во нејзината хуманитарна работа, пренесе Reuters.

Во смисла на нејзиниот пристап на исламистичкиот напад во Бенгази, кој републиканците го сметаат без преседан, поради необезбедувањето информации дека е можен напад во текот на протестите, сенаторот Пол запраша „дали таа би била таму за телефонски повик во 3 часот наутро“ како врховна командантка. Покрај тоа, смета дека целиот нејзин јавен живот бил во минатото лесна цел за критики во претстојната кампања.

Кога станува збор за инцидентот во Бенгази, Клинтон ја брани својата одлука американските дипломати да бидат распоредени на опасни локации, но признава дека нецелосните информации го зголемиле ризикот во овој либиски град во 2012 година. Во Бенгази, инаку, една година претходно започна бунтот против деценискиот либиски челник Моемер ел-Гадафи, кој го подржаа и САД, а денес е сцена на жестоки судири меѓу силите кои ги поддржува Западот и радикалните исламистички групации.

Американскиот државен секретар Џон Кери застана во одбрана на Хилари Клинтон, истакнувајќи дека таа направила одлична работа на обновување на американските односи во светот. „Таа направи извонредна работа на обновување на сојузништвата разорени претходните години“, изјави Кери за телевизиската мрежа ABC. Во изјавата за NBC News, дополни и дека Клинтон е „високо квалификувана“ за кандидатурата и изрази убеденост дека предизборната кампања ќе биде многу добра.

Во меѓувреме Кери потврди дека Стејт департментот има намера да ја заврши проверката на електронската пошта на Хилари Клинтон и ќе ги објави за околу еден месец. Последниот месец се појави и скандалот со однесувањето на поранешната државна секретарка која ги прекршила законските прописи, бидејќи за службена комуникација ја користела исклучиво приватната електронска адреса, а не службената, како што бараат внатрешните директиви на американската администрација.

„Стејт департментот во моментов ја проценува таа електронска коресподенција. Тоа ќе трае околу еден месеца или малку повеќе. Но ние ќе ги објавиме сите писма соодветно…“, рече Кери за телевизиската мрежа CBS. Истакна дека „преписката сега ја проучуваат со цел да не бидат објавени доверливи информации“.

Кери, исто така, истакна дека самиот тој целата преписка ја води „од службената адреса на Стејт департментот. „Сета моја преписка е заштитена со системот за безбедност на комуникациите на Стејт департментот“, додаде американскиот државен секретар./крај/мф/сн

Извор: Макфакс