Висок руски дипломат ги обвини САД во понеделникот дека имаат намера да го урнат претседателот Владимир Путин преку санкциите што ги воведоа против Москва поради украинската криза.
 

Висок руски дипломат ги обвини САД во понеделникот дека имаат намера да го урнат претседателот Владимир Путин преку санкциите што ги воведоа против Москва поради украинската криза.

Заменикот министер за надворешни работи на Руската Федерација, Сергеј Рјабков, пред парламентарците изјави дека односите меѓу Москва и Вашингтон се на многу ниско ниво и дека такви ќе останат, доколку санкциите траат подолг период.

„Не е никаква тајна дека цел на санкциите е да се создадат општествени и економски услови за промена на власта во Русија. Нема да има лесно и брзо излегување од ситуација“, изјави Рјабков на сослушувањето во долниот дом на рускиот парламент.

Истакна и дека не очекува дека САД „уште со децении“ ќе го признаат како дел од Русија црноморскиот полуостров Крим, кој во март по промената на власта во Киев преку референдум ја врати автономијата и се присоедини кон руската Федерација што Западот го смета за нелегално руско анектирање на украинска територија. Го обвини Вашингтон и дека сака да предизвика тензии меѓу Русија и поранешните советски републики.

По излагањето на Рјабков, пратеникот од владејачката партија Единствена Русија, Франц Клинцевич, за РИА Новости изјави дека санкциите претставуваа „Дамоклов меч за САД кои ги воведоа но не знаат како да се справат“.

„Украина за нив претставува главниот инструмент за притисок врз Русија. Со помош на Украина тие искрено веруваат дека ќе го разурнат единството на рускиот народ. Во тој случај ние имаме само еден излез. Ние не можеме молчешкум да гледаме како гинат Руси. Убеден сум дека ние ќе се бориме за секој човек, за секој Русин“, истакна Клинцевич.

Според него, ваквата ситуација значи дека секој чекор на Русија да ги заштити своите граѓани секогаш ќе биде следен со закана од санкции од Западот.

„Апсолутно сум сигурен дека воведувањето на оваа парадигма од санкции ќе се одрази во целиот свет, на глобалната економија. Русија е голема земја, ќе се справиме со тие проблеми, а тоа веќе го кажаа и претседателот и претставниците на владата. Произлегувајќи до моралниот пристап, сегашните руски позиции кои се во согласност со сите меѓународни норми, ние никогаш нема да се повлечеме, и да ги наведнеме главите. Подготвени сме на сé…“, порача рускиот пратеник.

Американскиот претседател Барак Обама претходно најави дека во петок ќе одржи консултации со клучните европски челници за воведување нови санкции против Русија. Според него, САД веќе имаат подготвено нов пакет санкции, вклучително и економски, кои Вашингтон е подготвен да ги примени по консултациите со европските сојузници.

Односите меѓу Москва и Вашингтон се заострија од почетокот на годината, откако двата големи ривали од периодот на блоковската Студена војна меѓусебно се обвинија за кризата во Украина.

Шефот на руската дипломатија Сергеј Лавров, во повеќе наврати повтори, дека идејата на Вашингтон, кој вршел според него притисок и врз ЕУ и врз многу земји во светот, е да ја смени власта во Русија, додека претседателот Владимир Путин неодамна оцени дека американските санкции се обид да се заузда и казни Русија бидејќи станала моќна и независна./крај/мф/сн

Извор: Макфакс