Руското министерство за надворешни работи во понеделникот уште еднаш одговори на американските обвинувања дека Москва наводно стои зад хакирањето на серверите на Националниот комитет на Демократската партија (DNC) како навредливи и недостојни, и обид да се прикрие манипулацијата на внатрешните избори во оваа партија.

Како што пренесува приватната руска агенција Интерфакс, министерството за надворешни работи објави дека ваквите обвинувања кои доаѓаат од највисоките личности на американските демократи, вклучително и претседателската кандидатка и поранешна државна секретарка Хилари Клинтон, како и од нејзиниот сопартиец актуелниот претседател на САД Барак Обама, Вашингтон не ги проследил преку официјални канали, туку само преку изјави во медиумите.

Кремљ во понеделникот повторно објави дека обвинувањата оти Москва стои зад хакирањето на електронската преписка на Демократската партија се дел од настојувањата да се прикрие големиот скандал и фактот дека со кампањата за предизборите во партијата се манипулирало, всушност со севкупните американски избори.

Портпаролот на Кремљ, Дмитриј Песков, за медиумите изјави дека обвинувањата кои во неделата ги искажа Хилари Клинтон во разговор за американската телевизиска мрежа Fox News за наводната руска вмешаност, претставува „апсурдна, емотивна предизборна реторика на којашто ѝ недостигаат аргументи“.

Песков, исто така, истакна дека е многу погрешно да се обвинува Русија, а претходно да не бидат истражени фактите поврзани со тие обвинувања.

Функционерите на американската Демократска партија минатиот петок објавија дека по вторпат биле цел на кибернетички напад, како и дека бил нападната мрежата на изборниот штаб, една седмица по големото протекување на електронската преписка меѓу членовите на највисокото извршно тело на партијата што фрли голема дамка врз претседателската номинација на Хилари Клинтон.

Непосредно пред почетокот на конвенцијата на Демократската партија во Филаделфија, пред две седмици, WikiLeaks објави над 19.000 електронски преписки на членовите на DNC во кои се гледа дека челниците на партијата, кои треба да бидат неутрални на внатрепартиските предизбори за претседателската номинација, не само што ја фаворизирале Клинтон, туку и советувале да биде дискредитиран нејзиниот противкандидат сенаторот Берни Сандерс, преку лиферување во медиумите на конструкции во врска со неговото потекло и верска определба.

Истовремено демократите обвинувањата за „руските траги“ во кибернетичките напади врз нивните сервери ги користат во продолжената антируска кампања, како и за пресметка со републиканскиот кандидат Доналд Трамп, велејќи дека наводното руско хакирање е помош на рускиот претседател Владимир Путин, кој исто така наводно бил близок со њујоршкиот милијардер.

Кремљ претходно оценувајќи ги ваквите обвинувања како „хорор приказни од кои подоцна се плашат самите нивни автори“, неколкупати повтори дека не се меша во внатрешните работи на ниедна држава. Трамп, пак, од своја страна во неделата за телевизијата ABC изјави дека, освен што смета дека САД треба да се потрудат да имаат подобри односи со Русија, воопшто нема ниту деловни, ниту лични односи со Русија, како ниту со претседателот Путин./крај/мф/сн

Извор: Макфакс