Русија во вторникот го оцени како „неприфатлив“ тонот на американскиот државен секретар Џон Кери кој Москва и сириската влада ги повика на воздржаност во борбите во околината на северниот сириски град Алепо, а на сомнежите за хуманитарните коридори од градот воспоставени на иницијатива на руската страна, потсети дека таквата практика Вашингтон ја применувале повеќепати во соседен Ирак.

„Веднаш штом сириската влада и војската, со наша помош, постигнаа реален успех во борбата со терористите, Американците започнаа да посегнуваат по противните методи, барајќи да ја прекинеме борбата против терористите“, изјави заменикот на рускиот министер за надворешни работи, Сергеј Рјабков во разговорот за агенцијата РИА.

„Тоа е сосема погрешно“, вели Рјабков, обвинувајќи ги САД дека ги „покриваат“ бунтовниците и нивните џихадистички сојузници во Алепо, поранешната финансиска престолнина на Сирија, во кој неколкуте квартови кои ги држат под контрола бунтовниците поддржани од Западот се под целосна опсада на сириските владини сили и нивните локални сојузнички милиции.

Аналитичарите сметаат дека доколку биде воспоставена целосна контрола над главниот град на истоимената покраина Алепо на границата кон Турција, тоа ќе претставува голем пресврт во повеќе од пет иполгодишната сириска војна во полза на силите на претседателот Башар ал-Асад.

Американскиот државен секретар Џон Кери во понеделникот ги повика Русија и владата на Сирија на воздржаност во офанзивата на Алепо. Истакна дека нападите на сириските сили ќе го оневозможат состанокот на судрените страни во понеделникот, во рамките на меѓународниот план за политичка транзиција во Сирија, кој беше закажан во понеделникот.

„Од моментот кога тој дневен ред (1-ви август) беше договорен до денес, речиси целото време е потрошено на воспоставување на позначителен прекин на огнот. Ќе видиме во следните часови и денови дали динамиката ќе се промени“, се жалеше пред новинарите американскиот државен секретар.

Рјабков ваквите изјави ги оцени како ултиматуми, нарекувајќи ги „уцена“.

„Кога Вашингтон вели дека следните часови и денови ќе бидат пресудни, тоа е ултиматум и таквиот тон е неприфатлив. Мислам дека тоа е уцена со која Американците редовно се служат“, додаде заменикот на шефот на руската дипломатија.

Рјабков притоа одговори и на изразените американски сомнежи во воспоставувањето на хуманитарните коридори за извлекување на цивилите и бунтовниците кои ќе го положат оружјето по новиот повик за општа амнестија што ја објави сирискиот претседател Башар ал-Асад, велејќи дека САД таквата практика ја применувале повеќепати во Ирак.

„Сакам да обратам внимание на фактот дека практиката воспоставување хуманитарни коридори (…) не е измислена од нас. Во соседен Ирак, во Мосул, ваквата практика се користеше повеќепати, и тоа со директно учество и одржување на самиот Вашингтон, кој сега преку високи функционери вели дека тоа не се правело така“, истакнува Рјабков.

„Зошто во сирискиот случај не би требало да се прави тоа во Алепо? Затоа што кога станува збор за Сирија на крајот сириската влада се изјасни за одделувањето на терористите од умерената опозиција (како што ги нарекува Западот вооружените сунитски бунтовнички групи – з.р.) и на цивилното население. Како што се покажа, нашите колеги во Вашингтон не биле подготвени на политичка одлука, и немале намера да го сторат тоа изминативе месеци и покрај сигналите и ветувањата коишто ни ги даваа“, појаснува Рјабков.

Зборувајќи за соработката во Алепо со другите страни, рускиот дипломат вели дека „не постојат јавни коментари од страна на хуманитарците, од страна на меѓународните организации, од редица наши партнери, со кои го продолжуваме дијалогот, како во Азија, така и во Европа“. Рјабков додаде дека Москва и натаму ќе го разработува планот за хуманитарните коридори во Алепо, со цел тие да бидат најефикасно спроведени во полза на цивилното население./крај/мф/сн

Извор: Макфакс