Русија целосно го отфрла заклучоците од истрагата коишто во вторникот ги објави Холандија за падот на малезискиот патнички авион на 15-ти јули 2014 година во источна Украина, обвинувајќи го украинскиот претставник во комисијата дека постојано ги менувал податоците за летовите на украинската воена авијација до и на денот на трагедијата, соопшти во средата руската агенција за воздухопловен сообраќај Росавијација.

Холандија во вторникот ги објави заклучоците од истрагата за падот на авионот „Malaysia Airlines“ на летот MH17 од Амстердам до Куала Лумпур, во која се утврдува дека леталото било соборено од проектил од системот „Бук“, но не се лоцира вината. А се истакнува дека била истрелана од територија која наводно била под контрола на рускојазичните бунтовници.

Таа истрага Холандија ја водеше со експерти од неколку со неколку земји, меѓу кои САД, Украина, Малезија, Австралија и Русија, но која е незадоволна од соработката во текот на истрагата.

Во вторникот, исто така, и рускиот концерн за оружје „Алмаз-Антеј“ во Москва ги претстави резултатите од своето вештачење, особено за типот ракета со кој бил соборен авионот, кое делумно се совпадна со холандскиот извештај. Но концернот тврди дека таквиот тип ракета Русија одамна не поседува и тврди дека го лоцирала точното место од кое е истрелана, и оти во тој период тоа било под контрола на силите лојални на Киев.

„Добивме информации за извештајот (…) и Русија целосно ги отфрла тие заклучоци, бидејќи сосема се неточни“, истакна потпретседателот Росавијација, Олег Сторчевој на прес-конференција.

„За жал, нашето учество во таа истрага беше сведено на информациите на коишто тие сакаат да ни ги дадат“, рече Сторчевој кој искажа уверување дека некои докази се лажирани и дека холандските истражители „сокриле важни податоци“.

„Извештајот е многу нелогичен и холандските одговори се неосновани, пристрасни и не се поткрепени со факти, и служат само да се поткрепи нивната верзија“, истакна Сторчевој.

„Еден од претставниците на украинската комисија за истрагата на еден од состаноците кажа дека украинската воена авијација пет дена пред падот не летала. На прашањето како ќе коментира дека тие денови на територијата на Украина е урнат авион, тој кажа ‘па јас одговорив дека тој (авијацијата) не летала“, раскажа Сторчевој.

Истакна дека руските претставници побарале таквото тврдење да биде потврдено со планот на летањата, но оти таквата информација никогаш не ја добиле.

„Повеќепати на нашите прашања дали има информација за планот на летовите на украинското воено воздухопловство, дали има информации за размена на информации меѓу воениот и цивилниот воздухопловен сектор, што е многу важно да се знае, ни беше одговарано дека таква информација нема и оти од некоја причина комисијата тоа не го предвидела, и покрај тоа што ние се обидовме да ја добиеме од неа“, појасни челникот на руската воздухопловна агенција.

Сторчевој најави дека Русија ќе го „искористи своето право“ и ќе ја продолжи истрагата, како и оти веќе ѝ се обратила на агенцијата при ОН – Меѓународната организација за цивилно воздухопловство, со барање таа да интервенира./крај/мф/сн

Извор: Макфакс