Русија ги повика во петокот САД да ја обноват директната соработка меѓу војските на двете земји за да се избегнат „ненамерни инциденти“ во Сирија, во моментите кои американски функционери, кои остануваат неименувани, преку медиумите тврдат дека Москва трупа сили за одбрана на својот сојузник сирискиот претседател Башар ал-Асад, а руската страна во моментов спроведува поморски вежби крај сирискиот брег.

САД ги предводат воздушните напади на меѓународната коалиција против џихадистите на Исламската држава во Сирија но без координација или одобрување од владата во Дамаск, па зголеменото присуство на руски сили кои имаат поморска база во сириското пристаниште Тартус би можело да ја зголеми евентуалноста некогашните непријатели од Студената војна да се судрат на боиштето, сметаат американските коментари.

Меѓутоа, Москва повеќепати во текот на минатата седмица преку своите највисоки државни функционери порача дека како и изминатите децении испраќа воена помош за владата во Дамаск, како и хуманитарна помош, но дека „е прерано да се зборува за руско воено присуство“ во Сирија, како што посочи претседателот Владимир Путин.

Рускиот министер Сергеј Лавров на прес-конференцијата во Москва во петокот ги обвини САД за прекинување на директната комуникација меѓу Русија и НАТО поради кризата во Украина, тврдејќи дека таквиот контакт е „важен поради избегнување несакани и ненамерни инциденти“, но притоа мислејќи на сириските копнени сили.

„Секогаш се залагаме луѓето од армиите да разговараат меѓу себе на професионален начин. Меѓусебно многу добро се разбираат. Доколку, како што многупати рече (американскиот државен секретар Џон) Кери, САД сакаат тие канали да бидат замрзнати, само нека повелат“, порача Лавров.

Руските воени вежби во близината на брегот на Сирија се редовни и се одржуваат во целосна согласност со меѓународното право, додаде Лавров.

„Што се однесува до вежбите во Средоземното Море, немам информации. Но факт е дека тие редовно ги одржуваат нашите воени поморски сили. Тие се спроведуваа во целосна согласност со нормите на меѓународното право, договорени за вакви случувања“, одговори шефот на руската дипломатија.

За соработката со коалицијата против Исламската држава со Дамаск, Лавров порача дека Русија ги повикува членките на меѓународната коалиција којашто ја предводат САД, за поефикасно дејствување да соработуваат со владата на претседателот Асад и со сириската армија.

„Секогаш принципиелно се залагавме во сите сфери, а особено во такви сложени како што е борбата против тероризмот, за колективна соработка, која ќе се заснова на нормите на меѓународното право. Коалицијата еднострано беше формирана, без согласност со Советот за безбедност при ОН, без согласност со клучната за решавање на оваа антитерористичка задача земја како што е Сирија. Уште тогаш предупредивме дека таквиот пристап има многу тешкотии, компликации и зборувавме за неопходноста од координирана активност на сите инволвирани страни, вклучително и сириската влада“, рече Лавров.

Според него, неопходна е координација, особено поради ефикасност на теренот. „Сите воени експерти се согласни дека само со воздушни удари не може да се порази Исламската држава. Неопходна е координација со силите на теренот, а најефикасна и моќна копнена сила во борбата со Исламската држава е сириската армија“, смета Лавров.

„Координацијата, исто така, е важна и поради спречувањето различни недозволени ненамерни инциденти. На тоа предупредуваме уште од самиот почетока на активностите на коалицијата што ја водат САД“, порача шефот на дипломатијата на Русија.

Според Лавров сега е моментот коалицијата да соработува со сириската влада, а во полза на тоа се изјасниле и низа шефови на дипломатиите на европските земји коишто . „ја разбираат контрапродуктивноста на моменталната ситуација и разбираат што е приоритетот“.

„Доколку приоритет е борбата против тероризмот, мора да ги ставиме настрана сите конјуктурни фактори, како што е промената на власта во Сирија“, рече Лавров предупредувајќи дека претходните обиди за сменување на властите во Либија и во Ирак „доведоа до, без преседан, зголемување на терористичката закана и ѝ овозможи на Исламската држава да ја оформи својата структура, која сега се гледа во регионот“./крај/мф/сн

Извор: Reuters/TАСС